UDokotela uSizwe Zungu uzogijima umjaho we-Washie 100 Miler ongamakhilomitha angu-161(161KM)
SHEILA MHLONGO
• UDokotela uSizwe Zungu uzogijima umjaho we-Washie 100 Miler ongamakhilomitha angu-161(161KM)
• Umkhankaso uhlose ukuqoqa u-R100 000 ukusiza abafundi bezobudokotela base-UKZN ababhekene nezinkinga zezimali
• Lolu hlelo luyingxenye yokugubha iminyaka engu-20 iqembu le-MBChB Class of 2006 lathweswa iziqu ngokubuyisela emphakathini nangokusiza odokotela besikhathi esizayo
Njengoba iqembu le-MBChB Class of 2006 ligubha iminyaka engu-20 selathweswa iziqu eNyuvesi yaKwaZulu-Natal (UKZN), omunye wabafundi bakudala bale nyuvesi uzimisele ukwenza okungaphezu kokujwayelekile ukuze enze umehluko empilweni yodokotela besikhathi esizayo.
Owayengumfundi wase-UKZN nongudokotela onguchwepheshe kwezokubulala izinhlungu ngesikhathi sokuhlinzwa (Specialist Anaesthesiologist), uDkt uSizwe Zungu, uzobhekana nomjaho odume umhlaba wonke i-Washie 100 Miler (161km) ozokuba seMpumalanga Kapa kule nyanga kaNtulikazi ngenhloso yokuqoqa u-R100 000 ozosiza ekukhokheni imali yokubhalisa yabafundi bezobudokotela base-UKZN abafanele kodwa ababhekene nobunzima bezezimali.
Lo mkhankaso wokuqongelela imali, ohlelwe yi-UKZN Foundation, uyingxenye yemigubho yeminyaka engu-20 yeqembu le-MBChB Class of 2006, okuhlanganisa nokubuyisela esikhungweni semfundo esasibumba ikusasa labo lobungcweti.
I-Washie 100 Miler ithathwa njengomjaho womgwaqo wamamayela ayi-100 omdala kunayo yonke e-Afrika futhi ingomunye wemijaho enzima kakhulu yokukhuthazela eNingizimu Afrika.
Umjaho wango-2026 uzobanjwa kusukela mhla zingama-31 kuNtulikazi kuya mhla zi-2 kuNcwaba, uqale eCathcart Country Club eCathcart uphele eBuffs Club e-East London.
NgokukaDkt Zungu, lo mjaho wamakhilomitha angu-161 awugcini nje ngokuhlola amandla omzimba kuphela.
“I-Washie 100 Miler iwuvivinyo olukhulu lokukhuthazela. Umjaho uthatha amahora angu-26 futhi udinga ukuzimisela okukhulu. Endleleni kunamavolontiya amaningi azidela kakhulu ukuze asekele abagijimi. Ukuzinikela kwawo kusinika amandla okuqhubeka size sifinyelele entanjeni yokugcina,” kusho yena.
UDkt Zungu uthe ugqugquzelwa ngabantu abakholelwa emandleni akhe ngesikhathi esewadinga kakhulu.
“Ngihlala ngikhumbula bonke abangisizayo, abangane, othisha, abeluleki kanye nozakwethu abenze ngaba yilokhu engiyikho namuhla. Lo mkhankaso uyithuba lokuhlonipha umusa wabo ngokusiza omunye umfundi afeze iphupho lakhe lokuba udokotela.”
UDkt Zungu ukhuthaza bonke abafundi bakudala base-UKZN, abasebenzi benyuvesi, ochwepheshe bezempilo, izinhlangano zezokwelapha kanye nezinkampani ukuthi basekele lo mkhankaso ngokunikela ukuze kufinyelelwe umgomo wokuqoqa imali. Yonke iminikelo izosiza abafundi bezobudokotela ababhekene nobunzima bokuthola imali yokubhalisa ukuze baqhubeke nezifundo zabo.
UDkt Zungu ungomunye wodokotela abahlonishwayo emkhakheni wezempilo kahulumeni nowangasese. Ngemuva kokuphothula iziqu zakhe ze-MBChB e-UKZN, waphinde wathola iDiploma in Anaesthetics (DA), iMaster of Medicine in Anaesthetics (MMed), kanye neFellowship of the College of Anaesthetists of South Africa (FCA), okuyisiqu esihlonishwa kakhulu.
Usebenze njengodokotela eNgwelezane Hospital nasePrince Mshiyeni Memorial Hospital ngaphambi kokuba aqeqeshelwe ubungcweti ezibhedlela ezahlukene ezisebenzisana ne-UKZN. Namuhla usebenza njengodokotela onguchwepheshe kwezokubulala izinhlungu ngesikhathi sokuhlinzwa enkampanini yakwaDr Edington and Partners eThekwini.
“Uhambo lokuba udokotela onguchwepheshe lwalunzima, kodwa lwaba yinto eyayifanele yonke imizamo,” kusho yena.
Ukugijima kube yingxenye ebalulekile yempilo yakhe kule minyaka eminingi. Ngemuva kokushiya uhlelo lwakhe lokuqeqeshelwa ubungcweti ngo-2015, waqala ukugijima njalo nomfowabo kanye nomngani wakhe omkhulu. Basungula neqembu le-WhatsApp elibizwa nge-Dream Chasers, bekhuthazana ukufeza amaphupho abo amakhulu.
Ngo-2016, uDkt Zungu waqeda iComrades Marathon yakhe yokuqala, okuyinto eyavusa uthando lwakhe lwemijaho emide olusaqhubeka nanamuhla.
Ngaphandle kwezobudokotela nemidlalo, uDkt Zungu uthanda kakhulu ubuciko, umculo namasiko, okuyizinto eziqhubeka nokunothisa impilo yakhe yomuntu siqu kanye neyobungcweti.
Isikhulu se-Legacy and Endowment e-UKZN Foundation, uNksz Tankiso Mabotha, sithe:
“Lo mkhankaso wokuqongelela imali uyisikhumbuzo sendima enkulu engadlalwa abafundi bakudala ekusizeni izizukulwane ezizayo. Ngokweseka abafundi ababhekene nobunzima bezezimali, iqembu le-MBChB Class of 2006 lizosiza ukuqinisekisa ukuthi abafundi abanekhono kwezobudokotela bayaqhubeka nezifundo zabo, bagcine sebefaka isandla ekuthuthukiseni uhlelo lwezempilo lwaseNingizimu Afrika.”
Labo abafisa ukunikela kulo mkhankaso bangakwenza nge-UKZN Foundation.
Ukuze uthole ulwazi olwengeziwe, vakashela: https://foundation.ukzn.ac.za/
Ungalandela nohambo lukaDkt Zungu lomjaho wamakhilomitha angu-161 ezinkundleni zokuxhumana ze-UKZN:
- Facebook: https://www.facebook.com/ukzn1/
- Instagram: https://www.instagram.com/ukzn/
- X: https://x.com/ukzn
- YouTube: https://www.youtube.com/user/UKZNSouthAfrica
