Abadlali besilisa beNetball abebeyingxenye yomqhudelwano
Umdlali weNetball wesifazana emqhudelwaneni obuqhubeka
KZN NAMUHLA SPORTS
Iqembu leCheetahs SA liphinde lazibonakalisa njengelinye lamaqembu ahamba phambili emdlalweni weNetball KwaZulu-Natal, kulandela ukuvikela ngempumelelo isicoco salo esigabeni sabesifazane, ngesikhathi i-Ocean Predators ihlabana ngesicoco sabesilisa emqhudelwaneni wamanqamu we-KZN Netball Super League ka-2026.
Lo mqhudelwano ububanjelwe e-UKZN Westville Sports Centre, eThekwini, ngoMgqibelo mhla ziyi-17 Okthoba 2026, lapho amaqembu aphambili esifundazweni ebebanga khona izicoco zobumpetha.
ICHEET AHS SA IQHUBEKA NOKUBUSA KWABESIFAZANE
Iqembu leCheetahs SA linqobe iHammarsdale Sunbeams ngamaphuzu angu-44 kwangu-38 emdlalweni wamanqamu, lavikela isicoco salo.
Ngaphambi kokufinyelela kowamanqamu, iCheetahs SA ibihlule iZiphozonke ngamaphuzu angu-45 kwangu-41 emdlalweni owandulela owamanqamu.
Ngakolunye uhlangothi, iHammarsdale Sunbeams ifinyelele kowamanqamu ngemuva kokunqoba iBSS Stars ngamaphuzu angu-40 kwangu-38 emdlalweni obushubile.
I-OCEAN PREDATORS ITHWESWA UMQHELE WABESILISA
Esigabeni sabesilisa, i-Ocean Predators ikhombise amandla ngokunqoba i-Ocean Dolphins ngamaphuzu angu-46 kwangu-34 emdlalweni owandulela owamanqamu.
ICheetahs SA yona ifinyelele kowamanqamu okokuqala emlandweni wayo esigabeni sabesilisa, kulandela ukunqoba iMtuba Central ngamaphuzu angu-48 kwangu-47 emdlalweni obushube kakhulu.
Emdlalweni wamanqamu, i-Ocean Predators ibuyise isicoco sayo ngokuhlula iCheetahs SA ngamaphuzu angu-54 kwangu-31, yathweswa umqhele wokuba ngompetha be-KZN Netball Super League ka-2026 esigabeni sabesilisa.
AMAQEMBU ANYUSELWE EZIGABENI EZIPHEZULU
Lo mqhudelwano uphinde wanikeza amaqembu ithuba lokulwela ukukhuphukela ezigabeni eziphezulu noma ukuvikela izindawo zawo kuligi.
IAmanzimtoti Netball Club inyuselwe esigabeni A isuka esigabeni B ngemuva kokunqoba iPinetown Eagles, yona ezodlala esigabeni B ngesizini ezayo.
Iqembu iThe Ones nalo likhuphukele esigabeni B ngemuva kokunqoba iHappy Club, ezokwehlela esigabeni C ngesizini ezayo.
Le miphumela ikhombise ukukhula komdlalo weNetball KwaZulu-Natal kanye namathuba avulekele amaqembu ukuthi athuthuke aze afinyelele ezingeni eliphezulu.
IZIKHULU ZIKAHULUMENI NABEZEMIDLALO BEZIWES EKILE UMQHUDELWANO
Lo mcimbi ubusingathwe nguMasipala weTheku, lapho ubuhanjelwe khona nguNgqongqoshe Wezemidlalo, Ubuciko Namasiko KwaZulu-Natal, uMnu Mntomuhle Khawula.
Phakathi kwezicukuthwane ebezikhona kubalwa uMengameli weNetball South Africa, uMami Diale; uMengameli weKZN Netball, uNkk Gugu Ngema; uMntwana Mhlangano Zulu; omele iSport Confederation, uMnu Mbuyazi; omele i-aQuellé, uSharon Conbrink; kanye noSihlalo we-eThekwini Netball, uSiviwe Mbhekeni.
Bekukhona nabanye abaxhasi, abaholi bezemidlalo kanye nababambiqhaza abahlukene.
ABADLALI ABAHLONISHWE NGOKWENZA KAHLE
Abadlali abenze kahle kulo mqhudelwano baklonyeliswe ngezigaba ezahlukene:
- Umdlali ovelele ekuhlaseleni – Abesifazane: Thabitha Mthembu (Cheetahs SA).
- Umdlali ovelele ekuhlaseleni – Abesilisa: Wandile (Cheetahs SA).
- Umdlali ovelele enkabeni yenkundla – Abesifazane: Xolile Shange (Hammarsdale Sunbeams).
- Umdlali ovelele enkabeni yenkundla – Abesilisa: Qiniso Gwala (Ocean Predators).
- Umdlali ovelele ekuvikeleni – Abesifazane: Ayanda Jiyane (Ziphozonke).
- Umdlali ovelele ekuvikeleni – Abesilisa: Vukile Zulu (Ocean Predators).
- Umdlali ovelele kunabo bonke – Abesifazane: Nosihle Mkhwanazi (Cheetahs SA).
- Umdlali ovelele kunabo bonke – Abesilisa: Sihlesenkosi Nxumalo (Ocean Predators).
I-KZN NETBALL IBONGA UKWESEKWA KOMDLALO
Inhlangano yeKwaZulu-Natal Netball idlulise ukubonga kuMasipala weTheku, i-aQuellé, iGilbert Netball South Africa, uMnyango Wezemidlalo, Ubuciko Namasiko, kanye nabo bonke abaxhasi ababambe iqhaza empumelelweni yalo mqhudelwano.
Iphinde yabonga onompempe, abaphathi bamaqembu, amavolontiya, abadlali nabalandeli ngokuzinikela kwabo ekuthuthukiseni umdlalo weNetball esifundazweni.
Lo mqhudelwano uphethe isizini ka-2026 ngendlela ekhombise ukuncintisana okusezingeni eliphezulu, ukukhula kwamakhono abadlali kanye nokubaluleka kokweseka ezemidlalo KwaZulu-Natal.
Umthombo: KwaZulu-Natal Netball Communications.
