Abahlali baseThekwini sebezokwazi ukufinyelela kalula ezinsizeni zoMnyango Wezokulawulwa Kwezinhlekelele kulandela ukwethulwa kohlelo olusha lwe-WhatsApp Chatbot nguMasipala weTheku.
SHEILA MHLONGO
UMasipala weTheku wethule uhlelo olusha lwe-WhatsApp Chatbot oluzosiza umphakathi ukubika izigameko zezinhlekelele ngokushesha, uthole ulwazi olubalulekile ngokuphepha kanye nokuxhumana ngqo noMnyango Wezokulawulwa Kwezinhlekelele (Disaster Management).
Lolu hlelo lwethulwe ngoLwesihlanu, mhla zingama-30 kuMfumfu 2026, ngenhloso yokuqinisa ukuphepha kwabahlali nokwenza kube lula ukubika izigameko ezibeka impilo yabantu nempahla yabo engcupheni.
Uhlelo lutholakala ngezilimi ezimbili, isiZulu nesiNgisi, ukuze umphakathi ukwazi ukulusebenzisa kalula.
IMEYA XABA INXUSA ABAHLALI UKUBA BASEBENZISE LOLU HLELO
IMeya kaMasipala weTheku, uKhansela Cyril Xaba, eyethule ngokusemthethweni le WhatsApp Chatbot, ithe ubuchwepheshe besimanje bungadlala indima enkulu ekusindiseni izimpilo nasekuqiniseni amandla emiphakathi okubhekana nezinhlekelele.
“Uhlelo lwe-eThekwini Disaster Management Chatbot lukhombisa indlela ubuchwepheshe obungasetshenziswa ngayo ukusindisa izimpilo nokuqinisa amandla emiphakathi okubhekana nezinhlekelele.
“Ngokwenza ulwazi olutholakala ngesikhathi sangempela lufinyelele kalula kubahlali, sisiza imiphakathi ukuthi ihlale inolwazi, ixhumene futhi ikulungele ukubhekana nezinhlekelele uma zenzeka,” kusho uXaba.
IMeya iphinde yanxusa abahlali ukuthi balusebenzise ngokugcwele lolu hlelo ukuze basize uMasipala ekutholeni ulwazi ngezimo eziphuthumayo.
“Abahlali abagcini nje ngokuba ngabantu abathola izinsiza zikahulumeni, kodwa bangabalingani ababalulekile ekuvikeleni imiphakathi yabo. Ukubika izigameko ngesikhathi kanye nokubamba iqhaza komphakathi kungasiza ukusindisa izimpilo nokunciphisa ubungozi bezinhlekelele,” kusho uXaba.
UHLELO LUZOSIZA EKUBIKENI IZIKHUKHULA, IZIVUNGUVUNGU NEMILILO
UMasipala weTheku uvame ukubhekana nezinhlekelele ezihlanganisa izikhukhula, izivunguvungu ezinamandla kanye nemililo, okuvame ukubeka izimpilo zabantu, amakhaya nengqalasizinda engcupheni.
Ukusetshenziswa kwalolu hlelo kulindeleke ukuthi kuthuthukise izindlela zikaMasipala zokuxwayisa umphakathi kusenesikhathi ngezingozi ezingase zivele.
Kuzophinde kusize ukuthi imibiko yezigameko ifinyelele ngokushesha eminyangweni efanele ukuze kuthathwe izinyathelo eziphuthumayo.
UMNYANGO WEZINHLEKELELE WAMUKELA UBUCHWEPHESHE OBUSHA
UMqondisi Wezokulawulwa Kwezinhlekelele kuMasipala weTheku, uVincent Ngubane, uthe lolu hlelo luzoqinisa ukuxhumana phakathi kukaMasipala nemiphakathi.
“Lobu buchwepheshe obusha buqinisa ukuxhumana phakathi kwemiphakathi noMasipala, buthuthukise ukubikwa kwezinhlekelele kusenesikhathi kanye nokusabela ngokushesha.
“Buphinde bunikeze abahlali amandla okuba ngabalingani abakhuthele ekuvikeleni izimpilo, impahla kanye nemvelo,” kusho uNgubane.
INDLELA YOKUSEBENZISA UHLELO LWE-WHATSAPP CHATBOT
Abahlali abafisa ukusebenzisa lolu hlelo bangalufinyelela ngokuskena ikhodi ye-QR etholakala kuphosta ekhishwe nguMasipala weTheku ehambisana nalesi simemezelo.
Ngokusebenzisa lolu hlelo, abahlali bazokwazi ukubika izigameko ngesikhathi ezenzeka ngaso, bathole ulwazi olubalulekile lwezokuphepha futhi baxhumane nezinsiza zoMnyango Wezokulawulwa Kwezinhlekelele.
UMasipala unethemba lokuthi lolu hlelo luzokwenza kube lula ukuxhumana phakathi kweziphathimandla nomphakathi, luphinde lunciphise isikhathi esithathwayo ukusabela ezimweni eziphuthumayo.
Lolu hlelo luhlose ukuthuthukisa ukubikwa kwezinhlekelele, ukusheshisa ukuxhumana kanye nokwakha imiphakathi ephephile nekwazi ukubhekana nezimo eziphuthumayo.
Umthombo: UMnyango Wezokuxhumana Nokumaketha kaMasipala weTheku (eThekwini Municipality Communications and Marketing Directorate).
