


Imikhiqizo yezingubo yezinkampani iHouse of Vyagor Louvre nePaul Kotini House ikhangiswe embukisweni weMTC Windhoek Fashion Week, obubanjelwe eMaerua Mall, eNamibia, kusukela mhla zizi-4 kuya kumhla ziyisi-7 kuNovemba 2026. Ukubamba kwazo iqhaza bekuyingxenye yohlelo lukaMasipala weTheku lokushintshisana ngamathuba, okuhloswe ngalo ukuvulela abasiki bengqephu bendawo izimakethe ezintsha, ukukhulisa udumo lwemikhiqizo yabo nokubasiza bafinyelele kubathengi bamazwe ngamazwe.
Abasiki bengqephu ababili baseThekwini bancome uMasipala weTheku ngokubavulela amathuba okukhangisa ngemikhiqizo yabo emazweni angaphandle kweNingizimu Afrika, kulandela ukubamba kwabo iqhaza embukisweni wezemfashini i-MTC Windhoek Fashion Week, obubanjelwe enxanxatheleni yezitolo iMaerua Mall, eNamibia, kusukela mhla zizi-4 kuya kumhla ziyisi-7 kuNovemba 2026.
USiphesihle Khoza wenkampani iHouse of Vyagor Louvre kanye noSanele Sibisi wenkampani iPaul Kotini House bamele iTheku kulolu hlelo lokushintshisana ngamakhono namathuba phakathi kweDurban Fashion Fair (DFF) neMTC Windhoek Fashion Week, oselungene onyakeni wesine.
Laba basiki bengqephu bakhethwe kulandela imiklomelo ye-DFF Recognition Awards ka-2026, lapho uKhoza aklonyeliswa khona ngendondo yeBest Menswear Collection, kwathi uSibisi walala isibili.
Lo mbukiso ubuhlanganise abasiki bengqephu abangama-45 abavela emazweni ahlukahlukene ase-Afrika nakwamanye amazwe omhlaba.
Ubambiswano phakathi kweTheku neWindhoek, olwasungulwa ngo-2023, luhlose ukuqinisa ubudlelwano embonini yezemfashini, nokuvulela abasiki bengqephu bendawo izimakethe ezintsha zamazwe ngamazwe.
UKhoza uthe ukubamba iqhaza kulo mbukiso kumvule amehlo ngendlela amabhizinisi ezemfashini asebenza ngayo kwamanye amazwe, ikakhulukazi eNamibia, lapho abasiki bengqephu beqhuba amabhizinisi ahlukahlukene ukuze bakwazi ukuziphilisa.
“Ukubona indlela abasiki bengqephu abaqhuba ngayo amabhizinisi ahlukahlukene kungivule amehlo, kwangikhuthaza ukuba nami ngicabange ngokwandisa ibhizinisi lami,” kusho uKhoza.
Uphinde wancoma uhlelo lweDurban Fashion Fair lukaMasipala weTheku ngokumeseka ekukhuliseni ibhizinisi lakhe.
“Ngosizo nobambiswano oluhlinzekwa yilolu hlelo, sengikwazile ukuthola imishini yokusebenza ebiza ngaphezu kuka-R60 000, ngabamba iqhaza emibukisweni yezemfashini engaphezu kwemihlanu, ngaphinde ngakhulisa amandla ebhizinisi lami okukhiqiza izingubo ngobuningi,” kusho yena.
Ngakolunye uhlangothi, uSibisi uthe lo mbukiso uvuse intshisekelo enkulu ngemikhiqizo yakhe, waphinde wamvulela amathuba okubambisana nabanye osomabhizinisi esikhathini esizayo.
“Sishintshisane ngemininingwane yokuxhumana nabantu abangase babe amakhasimende ethu. Lokhu kuyisiqalo sezinto ezinkulu enkampanini iPaul Kotini House ezimakethe zamazwe ngamazwe,” kusho uSibisi.
ITHEKU LIQINISA UBUDLELWANO NAMAZWE ANGAPHANDLE
Ithimba likaMasipala weTheku beliholwa nguNonku Mthembu, oyiPhini loMqondisi wezokuThuthukiswa kwamaBhizinisi Amancane, Aphakathi Nendawo Nasafufusa (MSME Development).
Leli thimba liphinde lahlangana nabaqondisi beMTC Windhoek Fashion Week ukuze kuxoxiswane ngamathuba okwandisa izinhlelo zokushintshisana ngabasiki bengqephu, onobuhle kanye nokubambisana emikhakheni yezobuciko.
Ngesikhathi livakashele eWindhoek naseNeumarkt, ithimba ligxile nasekufundeni ngezindlela zokuthuthukisa izindawo zokuhweba zabadayisi abangekho emkhakheni wamabhizinisi asemthethweni, ukwesekwa kosomabhizinisi, ukuthotshelwa kwemithetho kanye nokuphathwa kwezimakethe.
Kusukela mhla ziyisi-9 kuya kumhla ziyi-13 kuNovemba 2026, izikhulu zaseThekwini, eWindhoek naseNeumarkt zibambe uhlelo lokushintshisana ngolwazi namakhono, obekuhloswe ngalo ukufunda ngezindlela zokuthuthukisa amabhizinisi, ukweseka osomabhizinisi, ukusungula amabhizinisi asebenzisa ubuchwepheshe kanye nokuguqula izinto ezintsha zibe yimikhiqizo engadayiswa.
Izingxoxo ziveze amathuba okuqinisa ukwesekwa kwamabhizinisi amancane naphakathi nendawo, ukuthuthukisa izinhlelo zokukhulisa amabhizinisi asafufusa, ukweseka amabhizinisi asezindaweni zasemalokishini kanye nokusungula izinhlelo zokubambisana.
Lezi zingxoxo ziphethe ngokuphakanyiswa kwezinto ezibalulekile okumele kubhekwane nazo kanye nohlelo lokusebenza lokuqhubekisela phambili ubudlelwano phakathi kwalawa madolobha.
IDolobha laseWindhoek lizibophezele ngokuvakashela eThekwini ngo-2027 ukuze kuqhutshekwe nalolu hlelo lokubambisana.
UMthembu uthe lolu hlelo luyaqhubeka nokuvulela abasiki bengqephu baseThekwini amathuba okufinyelela ezimakethe zamazwe ngamazwe, ngesikhathi kuqiniswa nokwesekwa kwamabhizinisi amancane kanye nomnotho wabahwebi abangekho emkhakheni osemthethweni.
“Ngaphezu kwalokho, sesithole intshisekelo evela e-Angola yokuba abasiki bengqephu bethu babambe iqhaza emicimbini yezemfashini ezayo kulelo zwe. Lokhu kulandela ukuhlabeka umxhwele ngobuciko nezinga eliphezulu lomsebenzi okhonjiswe abasiki bengqephu ababili baseThekwini eWindhoek,” kusho uMthembu.
Lolu hlelo lubhekwa njengelinye lamathuba abalulekile okusiza abasiki bengqephu bendawo ukuba bakhulise amabhizinisi abo, bakhe ubudlelwano namanye amazwe futhi bafinyelele kumakhasimende amasha.
Umthombo: Uphiko lwezokuXhumana nokuMaketha lukaMasipala weTheku (eThekwini Municipality Communications and Marketing Directorate).


