THOBILE MBATHA
Ukuthuthwa kwabafundi kusaqhubeka nokuba yinselelo kwaZulu Natali ikomidi leMfundo eyisisekelo izwakalise ukukhathazeka ngokuqhubeka kokushoda kwezithuthi zabafundi ezanele ezizokwazi ukweseka uhlelo lwemfundo eyisisekelo eKZN.
Isitatimende sithe, ikomidi likuveze lokhu ngemuva kokuhambela izikole ezine ezingaphansi kwesiFunda iZululand ekupheleni kuka Masingana. Kanti ikomidi limatasa nokuvakasha kanye nokuqapha KwaZulu-Natali ukuyohlola ukuthi izikole zakulesi siFundazwe zikulungele yini ukuthatha ukumelana nonyaka ka-2023.
Lolu hlelo luthathe isonto lonke lokuhlanganisa ukuhambela iziFunda zaseZululand, Harry Gwala kanye neKing Cetshwayo ngosuku lokuqala bavakashele isikole iPhumanyova Technical High School, Manzezulu ECD Centre, kwaMame Full Service School kanye neZamimpilo Special School eziseZululand.
Ikomidi likhathazekile ngokuqhubeka nokushoda kwezinto zokuhamba abafundi ukuze bafinyelele kahle esikoleni baphinde babuyele emakhaya bephephile. ” Nakuba ikomiti libona izingqinamba zezimali ezibhekene nomnyango wesifundazwe kubasebenzi bakahulumeni jikelele, ukungakwazi ukuhlinzeka ngezokuthutha kufana nokungabaniki abafundi ithuba lokufunda ezikoleni ikakhulukazi abaphuma emindenini eswele.
Kuyasikhathaza ukuthi ziwu-1 148 izikole ezisohlwini lwabalinde ukuthuthwa kwabafundi esiFundazweni ngemali ebekiwe ewu-R1.8 billion, yize izindleko zinkulu kodwa ikomiti linombono wokuthi kufanele kubhekwe ukuthi kusizakala abafundi okumele bahambe amakilometres amathathu ukuze bafike esikoleni” kusho uMbinqo-Gigaba.
Ikomiti liphinde labhekisa amabombo esifundeni iKing Ceshwayo lapho bekuhlolwa izikole ezine okubalwa kuzo iDover Farm Scholol, iThuthukani Special school, iLembe Primary School kanye neTisand Technical High School
