Ikomidi lesiShayamthetho saKwaZulu-Natali elibhekele ukuBusa ngokuBambisana neziNdaba zoMdabu lincome imizamo kaMasipala weTheku yokusheshisa ukulethwa kwezidingongqangi eDolobheni kulandela izikhukhula zango-Ephreli ngonyaka odlule.
Ikomidi ebelihleli eMayville ngomhla ka- 17 Mashi lithole umbiko wenqubekelaphambili mayelana nokusebenza kohlelo lukaMasipala lokulungisa imigwaqo, ugesi, amanzi nengqalasizinda yokuthuthwa kwendle. UMasipala uphinde wabika ngohlelo lokuguqula iDolobha.
Yize usemkhulu umsebenzi okusamele wenziwe, ikomidi lanelisekile ngenqubekelaphambili ebonakalayo njengoba sekuthuthuke kakhulu ukuhlinzekwa kwamanzi nogesi eDolobheni ngemuva kwezikhukhula zango- Ephreli.
Phakathi kwezikhalo ezivezwe yileli komidi kubalwa ukunqamuka kwamanzi okudalwa kakhulu yingqalasizinda egugile, ukucekelwa phansi kwempahla nokuxhunywa kagesi ngokungemthetho. Ukubhekana nale nselelo, iDolobha lisebenzise intela yengqalasizinda ebekelwe ukunakekela ingqalasizinda kuphela.
Uxhaso lwabelwe nokulungiswa imigudu yendle nezikhungo zokuphehla amanzi angcolile ukuze kuncishiswe ukufa njalo kwazo futhi kugwenywe ukungcoliswa kwemvelo.
UMnyango wezokuBusa ngokuBambisana neziNdaba zoMdabu KwaZulu-Natali nawo wethule umbiko wokuhlola oveze ukuthi uMasipala usaqhubeka nokuba namandla ngokwezimali njengoba sekuqoqwe ingeniso efika kumaphesenti awu-92.
Umbiko uphinde wancoma uMasipala ngokwenza ngcono ekuqoqweni kodoti. IMeya yeTheku iKhansela uMxolisi Kaunda ichaze lo mbiko njengokukhombisa iqiniso ngokwenzeka kulo Masipala.
