OWAMI THABETHE
Liyanda isasasa kubasiki bengqephu abasafufusa abangu-22 abaqokelwe ukubamba iqhaza embukisweni wakulonyaka weDurban Fashion Fair (DFF).
- DFF izobanjwa kusukela mhlaka 18 kuya kumhlaka 20 kuSepthemba e-The Station Urban Event Space. Labo abaqokiwe DFF Mentorship ukuba bazokhangisa bathengise imikhiqizo yabo bazothola ithuba elinqazivele elingandele noma ubani elizobasiza impilo yabo yonke, njengoba bezobe bedayisela abantu abaphambili. Leli yithuba lokwethula imikhiqizo yabo.
Onyakeni wayo wesi-13, i-DFF Mentorship Programme iwuhlelo lokukhulisa imboni yezemfashini eThekwini nokwakha inkundla yokuqashwa kosomabhizinisi kulo
mkhakha.
Babalelwa ku-22 abasiki bengqephu abasebasha, abasafufusa asebefundiswe izinyanga ezingi-9 yiFezile Fashion Skill Academy.
Bathole izeluleko mayelana nokuma nokukhethwa kwezindwangu, ngokuqeqeshwa okuhlinzeka ngolwazi olubalulekile mayelana nokukhiqiza, ukuphathwa komkhiqizo, izindleko, nokuthi abathengisi bangangena kanjani endaweni yokudayisa.
Abaqeqeshi abathathu abethula amaqoqo ahamba phambili bazothola imiklomelo emangalisayo kuma-DFF Recognition Awards.
UNondumiso Mhlongo,odume ngelika Ndlovukazi , ungumnikazi wenkampani iCurved Ndlovukazi ladies wear brand. UNdlovukazi, obenguthisha iminyaka engu-20, ubehlale ezifela ngemfashini futhi efuna ukusebenza kulo mkhakha.
Uncome uMasipala ngohlelo lwawo lokuthuthukisa imfashini olumsize ukuthi afeze iphupho lakhe.
Umsiki wengqephu ozifundisile uNokwazi Mkhize waseCato Ridge ukhiqizela inkampani I Tailor Made by Kwazi. Isitayela sakhe sibandakanya izitayela zesimanje-manje zemfashini njengezingubo ze-corset nendwangu edayiwe. “Ngijabule ukukhombisa ingubo yami emele ukuqhakaza kwembali kwi-DFF yalo nyaka okuwuhambiselana kwami ne indikimba ethi ‘Coming of Age’,” kusho Nokwazi.
Thola amathikithi akho ku-inthanethi ku-www.webtickets.co.za noma kwa-Boxer noma kwa-Pick n Pay. Amathikithi abiza u-R120 umbukiso ngamunye. Kukhona namapasi osuku atholakalayo ngo-R250 wokuhambela yonke imibukiso ngosuku, kanti i-VIP ehlanganisa zonke izinsuku ezintathu ibiza u-R500.
