Isilo Samabandla Inkosi uMisuzulu kaZwelithini sikhuthaze isizwe ukuthi sigcine amasiko ngesikhathi kubungazwa uMkhosi waMaganu obubanjelwe esiGodlweni eMachobeni Kwamhlaba Uyalingana ngomhlaka 25 Febhuwari.
Sethula inkulumo yaso Isilo sibonge kakhulu ukubambisana okuhle noNdlunkulu, amaKhosi, izinduna, kanye noMnyango wezeMidlalo, amaCiko kanye naSiko okuyiwo obuwengamele lomkhosi, Kanti Isilo siphinde sancoma ukubaluleka kwalomkhosi kanye neqhaza lawo ekuvezeni amathuba okungenisa imali kubantu endaweni.
Umkhosi wamaGanu owaziwa ngesiNgisi njenge-Amarula Festival, ugujwa njalo uma kuqala inyanga kaFebruary. Lo mkhosi wenzeka nje kusuke kubungazwa ukuvunywa kwesithelo okuthiwa iganu phecelezi i-amarula. Lesi sithelo sijwayele ukuvunwa kusuka kaFebruary kuya kuMay.
Lesi sithelo sithela kakhulu ezindaweni ezisenyakatho yesifundazwe saKwaZulu-Natal ekubalwa kuzo yaseMkhanyakude neyakwaNongoma. Ngomkhosi wamaGanu-ke kusuke kusinwa, kugidwa kuculwa kujatshulwa kuya le nale.
Njalo uma kugujwa umkhosi wamaganu, abantu besimame bavame ukugaya utshwala besintu besebenzisa sona lesi sithelo. Ukhamba ke luqala kuso Isilo kanti uma buvuma, ubona ngaso sikhuthaza umphakathi ukuba ungenelele embungazweni.
