SHEILA MHLONGO
Isilo Samabandla onke uMisuzulu kaZwelithini sesiqoke uMeya wesifunda saseZululand,uMhlonishwa, uMfundisi Thulasizwe Buthelezi ukuthi kube nguye uNdunankulu kaZulu omusha.
IMeya uButhelezi ingene kulesikhundla ebesiphethwe Inkosi uMangosuthu Buthelezi. Ekhotheme ngonyaka ophelile. Isilo senze lesimemezelo ngoMgqibelo womhlaka 27 Januwari emcimbini obubanjelwe eNquthu wokukhumbula Impi yaseSandlwana eyabe iphakathi kukaZulu namaNgisi.
Ukuqokwa kukaNdunankulu uMfundisi Thulasizwe Buthelezi kuqede ukuqagela obekukhona lapho kube nezinsolo zokuthi kungase kuqokwe indodana yoMntwana waKwaphindangene, uMntwana uZuzifa Buthelezi.
Ngokwesikhundla sakhe uMfundisi uThulasizwe Buthelezi njengo Ndunankulu, Isilo siqoke Inkosi uPhathisizwe Donatus Hastings Chiliza owayenguSihlalo wendlu yobuholi boMdabu KwaZulu Natal.
Ukweseka umbono waso Isilo sokuqoka uNdunankulu kaZulu sithe, uButhelezi usebenze kahle kakhulu neSilo uGoodwill kaBhekuzulu ngesikhathi esaphila.
“UNdunankulu usebenze kahle kakhulu ngokuzikhandla nangokwethembeka eduze kweSilo Samabandla uZwelithini kaBhekuzulu esikhotheme,wakwazi ukwengamela izindlu zobuholi beNdabuko ngempumelelo ngakho lesikhundla simfanele kakhulu”.Kusho Isilo Samabandla uMisuzulu kaZwelithini.
Khona manjalo iqembu leIFP nalo lizwakalise ukusamukela isimemezelo seSilo Samabandla uMisizulu kaZwelithini sokuqoka iMeya yeqembu le IFP yesifunda iZululand ephinde ibe ilunga lekomidi lesigungu esiphezulu, uMfundisi uThulasizwe Buthelezi njengoNdunankulu kaZulu.
“Sifisela uNdunankulu kaZulu ukuthi abe namandla kanye nobuhlakani bokukwazi ukuthatha umsebenzi omkhulu owawenziwa ilabo abangaphambi kwakhe, siphinde sihalalisele Inkosi uChiliza esikhundleni sakhe.
“Kuyathokozisa ukwazi ukuthi Inkosi uChiliza yasebenzisana kakhulu noNdunankulu kaZulu uMntwana uMangosuthu Buthelezi mayelana nezindaba eziphathelene neSilo esakhothama uZwelithini Kabhekuzulu, nokuthi wabe ekhona ngonyaka ka 2018, ngesikhathi uMengameli wezwe uMnu Cyril Ramaphosa enza enza isibopho sokuthi angeke baphucwe abantu umhlaba wabo ongaphansi kwe Ingonyama Trust.
“Siyathemba futhi ukuthi ngaphansi kwalobuholi umhlaba kaZulu uzoqhubeka uvikelekile njengoba kwakunjalo ngesikhathi sikaNdunankulu uMntwana uMangosuthu Buthelezi”. Kuphetha uMengameli weIFP uMnu Velenkosini Hlabisa.
