SIPHELELE BUTHELEZI
Inkampani ehlinzeka amanzi, uMngeni-uThukela Water Board (UUW), izoqala uhlelo lokunciphisa amanzi ewaphakela eThekwini, oluzoqhubeka kuwo wonke uMasipala weTheku kusukela ngoLwesine, ngomhla ka-10 Okthoba.
Lesi simemezelo senziwe yiMeya yeTheku, uKhansela Cyril Xaba, ngokuhlanganyela noMngeni-uThukela Water Board.
Lolu hlelo lwenziwa ngokomyalelo woMnyango wezaManzi neNhlanzeko (i-DWS) okhiphe isaziso esibhekiswe kwi-UUW sokuba kuncishiswe inani lamanzi adonswa emithonjeni yoMngeni ukuze abuyele esikalini esigunyaziwe sika-470 million m3/ngonyaka. Lokhu kuzosho ukwehla kwenani lamanzi athengiswayo nokwehla kwamanzi adonswayo ngo-8.4 wamaphesenti.
UMeya Xaba uthe inhloso yokuncishiswa kwamanzi wukuqinisekisa ukuthi amanzi ahlala ekhona noma kunezimvula ezincane kunalezo ezejwayelekile.
“Uma kungekho sikali esibekiwe samanzi adonswa emithonjeni, lokho kungaba nobungozi bokuthi uma kwenzeka kuba nesomiso, singabe sisaba namanzi anele azovumela uMngeni-uThukela Water ukuthi uqhubeke nokuhlinzeka uMasipala weTheku ngamanzi ngendlela efanele,” usho kanje.
Lolu akulona uhlelo lokuhlinzeka amanzi izikhawu lapho amanzi azophuma khona ngezikhathi ezithile. Kepha, inhloso yokuncishiswa kwamanzi wukugwema ukuthi kuze kube nesidingo sokuhlinzeka amanzi izikhawu ngokuthi kwehliswe inani lamanzi asetshenziswayo njengamanje.
Lolu hlelo lokuncishiswa kwamanzi luzoqhubeka izinyanga eziwu-12.
“Sinxusa izakhamizi ukuthi zonge amanzi, zelekelele ekwehliseni izinga eliphezulu lokusetshenziswa kwamanzi. Njengoba sike sachaza esithangamini sabezindaba sangaphambilini, isidingo samanzi eThekwini singaphezulu kakhulu kwamanzi esinawo futhi siyaqhubeka nokunxusa bonke abantu basezindaweni zokuhlala nezamabhizinisi ukuthi basebenzisane nathi ukubhekana nale nselelo,” usho kanje.
Ezinye zezimbangela zokusetshenziswa kakhulu kwamanzi wukufudukela kwabantu emadolobheni ngokushesha, ingqalasizinda egugayo edala ukuvuza kwamanzi, kanjalo nokuxhunywa kwamanzi ngokungemthetho.
Ukuze kuqinisekiswe ukuthi izakhamizi azikhahlamezeki kakhulu, uMasipala uzothatha lezi zinyathelo zokungenelela ezilandelayo:
- Ukufakwa kwemishini elawula ukuphuma kwamanzi kuwo wonke amamitha
- Ukwehliswa komfutho wamanzi emapayipini
- Ukufaka amamitha kubona bonke abangakabi nawo
- Ukusheshisa umsebenzi wokulungisa lapho kuvuza noma kuqhume khona amapayipi ngokutshala abasebenzi abalungisa amapayipi abazozinza emawadini
- Ukufundiswa komphakathi ngokongiwa kwamanzi
- Ukunqanyulwa kwamanzi axhunywe ngokungemthetho
Isilinganiso samanzi asetshenziswayo eThekwini njengamanje siphezulu kakhulu njengoba siphakathi kuka-270 no-298 wamalitha asetshenziswa wumuntu ngamunye ngosuku (l/c/d) uma kuqhathaniswa nesilinganiso somhlaba esiwu-173 l/c/d.
Abasebenzi bakaMasipala bazoqhubeka nokuqapha isimo ukuze balawule izinga lokusetshenziswa kwamanzi ngesikhathi kuqhubeka lolu hlelo.
