SHEILA MHLONGO
UNgqongqoshe Wezokuvakasha wakuleli, uPatricia de Lille, uvule ngokusemthethweni i-Africa’s Travel Indaba 2025 ngoLwesibili lomhlaka-13 Meyi 2025 eThekwini eDurban ICC (Inkosi Albert Luthuli International Convention Centre), wethula inkulumo egqugquzela ukuthuthuka kwezokuvakasha okubandakanya izwekazi lase Afrika .
Phakathi kwezikhulumi ngesikhathi kuvulwa i-Africa Travel Indaba, kuhlanganisa uSekela Mengameli uMnu Paul Mashatile, uNdunankulu waKwaZulu-Natali uMnu. Thami Ntuli okunguye owethule iPhini likaMengameli, uNgqongqoshe wezokuThuthukiswa koMnotho, ezokuVakasha kanye nezeMvelo, esifundazweni, iMeya yeTheku ukhansela Cyril Xaba owemukele izihambeli zedolobha iTheku.
Izethameli ebezikhona kuhlanganisa oNgqongqoshe bezokuvakasha basemazweni ehlukene e-Afrika, abathengi bamazwe omhlaba, abezindaba, kanye nosomabhizinisi bemboni yezokuvakasha.
UNgqongqoshe uDe Lille uthe iAfrika Tavel Indaba ineqhaza elibalulekile ekudaleni amathuba emisebenzi, ekuthuthukiseni umnotho, kanye nasekwenzeni i-Afrika ibe ehamba phambili emkhakheni wezokuvakasha emhlabeni jikelele.
“Ezokuvakasha zibalulekile emnothweni waseNingizimu Afrika nakuzwekazi laseAfrika yonkana. Ngo-2024, iNingizimu Afrika yamukele izivakashi eziyizigidi ezingu-8.9, ezachitha imali engu-R91.6 billion, kwadaleka imisebenzi engaba ngu-1.6 million. Kanti kulonyaka ka-2025 zikhule zaye zafinyelela kumaphesenti angu 5.7%.” Kusho uNgqongqoshe ude Lille.
Kulonyaka ka 2025 i-Afrika Travel Indaba ikwaze ukuheha izethameli ezingaphezu kuka-1300, amazwe angu-27 ase-Afrika kanye nabathengi bamazwe omhlaba abangaphezu kuka-1200.
UNgqongqoshe uthe u-75% wezivakashi zakwamanye amazwe eNingizimu Afrika zivela emazweni ase-Afrika. Kanti uhlelo lothuthukiswa lwezokuvakasha lweminyaka emihlanu luzokhuphula imisebenzi ibe ngu-2.5 .
million, kwande uchungechunge lwemali yangaphakathi ngo-25%, nomnikelo ku-GDP ukhuphuke ube ku-10%.
IPhini likaMengameli uMnu uPaul Mashatile wethule inkulumo yosuku wabe esevula i-Africa Travel indaba ngokuhlanganyela noNgqongqoshe bakuleli, uNdunankulu waKwaZulu-Natali kanye noNgqongqoshe basemazweni ase -Afrika.
