IPoster ekhuthaza abantu ukuthi babhalisele imishado yabo kungaze kudlule isikhathi esibekiwe
SHEILA MHLONGO
UMnyango wezaseKhaya usunxuse amalungu omphakathi angakayibhalisi imishado yawo yesintu ukuba akwenze lokho ngaphambi kokuba kuvalwe isikhathi esikhethekile sokubhalisa ngomhlaka-31 Agasti 2026.
Ukubhaliswa komshado kuvumela abashadile ukuba baqinisekise futhi balungise ngokusemthethweni isimo sabo somshado.
“Lokhu kubandakanya imishado eyaba khona ngaphambi kokuba uMthetho Wokuqashelwa Kwemishado Yesintu uqale ukusebenza ngoNovemba 2000, kanye naleyo eyaba khona ngemva kwalokho kodwa yangabhaliswa ngesikhathi esasibekiwe.
“UMnyango unxusa bonke abashadile abafanelekile ukuba babhalise ngaphandle kokulibala, ukuze bagweme olayini abade njengoba kusondela umnqamulajuqu,” kusho uMnyango.
Imininingwane eyengeziwe mayelana nendlela yokubhalisa umshado ingatholakala emahhovisi oMnyango wezaseKhaya asendaweni yangakini ezweni lonke.
“Abaholi bendabuko, abaholi bomphakathi kanye nezinhlangano zomphakathi nabo bayakhuthazwa ukuba basize ekuqwashiseni umphakathi futhi baqinisekise ukuthi abashadile abathintekayo bayaziswa ngomnqamulajuqu osusondele,” kusho uMnyango.
– SAnews.gov.za
