UMasipala weTheku uyaqhubeka nemizamo yawo yokuthuthukisa umnotho wasemalokishini ngokusondeza ukwesekwa kwamabhizinisi, amathuba okufinyelela ezimakethe, ukuthuthukiswa kwamakhono kanye namathuba okuxhumana kosomabhizinisi nasemiphakathini
Lokhu kuzobonakala ngesikhathi uMasipala usingatha umbukiso wezinsuku ezintathu i-South Regional Durban Business Fair, ozoba kusukela mhla zi-2 kuya kumhla zi-4 ku-Okthoba 2026 eKwaMnyandu Shopping Centre.
Lo mbukiso uzobanjwa ngaphansi kwesiqubulo esithi, “Regional Fairs: Growing Township Businesses and Strengthening Local Economies,” okuhloswe ngaso ukukhulisa amabhizinisi asemalokishini nokuqinisa umnotho wendawo.
Kulindeleke ukuthi kuhlanganyele amabhizinisi amancane naphakathi nendawo (MSMEs) angaba ngu-150, azokhangisa ngemikhiqizo nezinsizakalo zawo, axhumane ngqo namakhasimende nezimakethe ezingaba khona, aphinde athole amathuba okukhulisa amabhizinisi awo.
OKUZOGQAMA KULO MBukiso
Business Indaba | 2 Okthoba
Ngaphansi kwesiqubulo esithi “Growing Thriving Township Economies: Connecting MSMEs to Markets and Opportunities,” kuzohlangana ababambiqhaza nochwepheshe bezimboni ukuze kudingidwe izindlela zokuxhumanisa amabhizinisi asemalokishini nezimakethe kanye namathuba amasha.
Business Empowerment and Market Access Seminar | 2 Okthoba
Le seminar izobandakanya i-KZN Oils, Bidvest, National Empowerment Fund kanye nabanye ababambiqhaza. Kuzodingidwa ngezindlela zokweseka amabhizinisi, ukufinyelela ezimakethe kanye namathuba okukhula.
Make-up and Beauty Masterclass | 2–4 Okthoba
Lolu hlelo lwezinsuku ezintathu luzohlomisa osomabhizinisi abasafufusa nalabo asebevele besebenza emkhakheni wobuhle ngamakhono nolwazi lwemboni. Kuzophinde kuhlinzekwe ngama-make-up starter kits ukusiza labo abafuna ukuzisebenza.
Kiddiepreneur Garden | 2–4 Okthoba
Ngaphansi kwesiqubulo esithi “The Future Founders: Imagine Today, Build Tomorrow,” izingane nentsha bazokwethulwa kwezamabhizinisi ngezinhlelo ezihlanganisa ama-greenpreneur challenges, i-masterclass ye-Artificial Intelligence (AI) nobuchwepheshe, kanye nendawo yokufunda izincwadi. Inhloso wukutshala isiko lezamabhizinisi entsheni isencane.
Flavours of Durban | 2–4 Okthoba
Lolu hlelo luzonikeza abapheki abasafufusa nalabo asebezakhele igama ithuba lokukhombisa amakhono abo, babelane ngolwazi lokupheka futhi kugqanyiswe amabhizinisi okudla endawo nawasemalokishini.
W&RSETA Engagement Masterclass | 3 Okthoba
Osomabhizinisi bazothola ulwazi ngamathuba, ukuthuthukiswa kwamakhono kanye nezindlela zokungena nokukhula emkhakheni wezitolo nokudayisa.
Best Stand Competition | 4 Okthoba
Umbukiso uzophethwa ngokumenyezelwa kwabawinile abathathu emncintiswaneni we-Best Stand Competition, lapho kuzohlonishwa khona abakhangisi abavelele ngobuciko, indlela yokwethula kanye nokusungula izinto ezintsha.
IMINININGWANE YOMCIMBI
📅 Usuku: 2–4 Okthoba 2026
⏰ Isikhathi: 09h00–17h00
📍 Indawo: KwaMnyandu Shopping Centre
🎟️ Ukungena: Kumahhala
