ESITHOMBENI: Osomabhizinisi abasemkhakheni wezokuvakasha abahlomule ohlelweni lwe Durban Tourism
IDurban Tourism namuhla iphinde yaqinisekisa ukuzibophezela kwayo ekuqiniseni umkhakha wezokuvakasha nasekwesekeni amabhizinisi endawo ngokunikeza amabhizinisi ezokuvakasha angama-24 izinsiza zokusebenza ezinenani elihlangene lika-R720 000.
La mabhizinisi aphuma endaweni yesibili neyesithathu emcimbini wesihlanu wamaDurban Tourism Business Awards, owawubanjwe ngoNhlangulana 2026.
Abaphumelele emikhakheni eyehlukene bathola imiklomelo yabo emcimbini wokubaklomelisa . Umcimbi wokunikezelwa kwezinsiza zokusebenza ubuyingxenye yemizamo eqhubekayo yeDolobha yokuhlonipha nokweseka amasu amasha kanye nokwenza kahle emkhakheni wezokuvakasha, kanti ubungoLwesithathu lomhlaka 2 Septhemba.
Lo mcimbi uphothule uhlelo lokunikezelwa kwemiklomelo, njengoba abaphume endaweni yesibili neyesithathu bethole izinsiza ezikhethwe ngokuhambisana nezidingo zokusebenza zamabhizinisi abo.
Usizo olunikeziwe lubandakanya izinto zobuchwepheshe, ifenisha, impahla yasehhovisi kanye nezinye izinsiza ezibalulekile zokuqhuba amabhizinisi. Izinsiza zinikezwe abahlomulile ngokwezidingo ezithile ezazihlonzwe yibhizinisi ngalinye.
Lolu hlelo kuhloswe ngalo ukuqinisa ukusebenza kwansuku zonke kwalawa mabhizinisi, ukuthuthukisa amandla awo nokwakha isimo esiwavumela ukuba akhule futhi abambe iqhaza elibonakalayo emnothweni wezokuvakasha waseThekwini.
USihlalo weKomiti Lezokuthuthukiswa Komnotho Nokuhlela, uKhansela Thembo Ntuli, uthe iDolobha liyaliqaphela iqhaza elibalulekile elibanjwe amabhizinisi ezokuvakasha anamasu amasha ekukhuliseni imikhiqizo nezinsiza zezokuvakasha zaseThekwini.
“Impumelelo yeTheku njengendawo eheha izivakashi ixhumene namandla, ukuqina kanye nekhono lokuncintisana kwamabhizinisi nabantu abayingxenye yochungechunge lwethu lwezokuvakasha. Ukunikezelwa kwalezi zinsiza zokusebenza kuhlose ukuqinisekisa ukuthi amabhizinisi ethu ezokuvakasha anezinsiza ezidingekayo zokuqinisa ukusebenza kwawo nokukhula,” kusho uKhansela Ntuli.
Uthe ukweseka amabhizinisi ezokuvakasha kubalulekile ekwakheni umnotho wezokuvakasha ophilayo nobandakanya wonke umuntu, odala amathuba emabhizinisini endawo nasemiphakathini.
Abahlomulile balwemukele lolu sizo, baveza ukuthi izinsiza abazitholile zizobasiza ukubhekana nezinye zezinselelo ezingokoqobo abahlangabezana nazo ekuqhubeni nasekukhuliseni amabhizinisi abo.
Umnikazi weThe Lazy Moose, uMnu Luke Murgatroyd, owaphuma endaweni yesibili emkhakheni iGreen and Sustainable, uthe izinsiza ezitholwe yibhizinisi lakhe zizosiza ukuthuthukisa ukusebenza kahle nokukhiqiza, ziphinde zisize ekuxazululeni izinselelo zokusebenza.
AmaDurban Tourism Business Awards ayaqhubeka nokuhlinzeka ngenkundla yokukhangisa amabhizinisi abamba iqhaza elihle ochungechungeni lwezokuvakasha lwaleli dolobha. Aphinde akhuthaze amasu amasha, ukuhlinzekwa kwezinsiza ezisezingeni eliphezulu kanye noguquko kulo mkhakha.
Ngezinhlelo ezifana nale miklomelo nokunikezelwa kwezinsiza zokusebenza, iDolobha liqinisa ubudlelwano balo nezinkampani ezizimele futhi linika amabhizinisi ezokuvakasha amandla okusebenzisa amakhono awo ngokugcwele.
Lokhu kuzowasiza ukuba abambe iqhaza ekukhuleni okuqhubekayo kweTheku njengendawo yezokuvakasha esezingeni lomhlaba.
