Isithombe: Ikhwaya yesibili kaMasipala waseThekwini, eyaziwa nge-eThekwini Gospel Music Crescendos Choir, yethulwe ngokusemthethweni izolo, okuphawule elinye igxathu elibalulekile ekuzibophezeleni kweDolobha ekukhuliseni nasekuthuthukiseni amakhono omculo endawo.
UMasipala waseThekwini wethule ngokusemthethweni uhlelo lwesibili lweKhwaya i-eThekwini Gospel Music Crescendos ngomhlaka 14 Juni, emcimbini obubanjelwe e-Inkosi Albert Luthuli International Convention Centre.
Lo mcimbi uqophe elinye igxathu elibalulekile ekuzibophezeleni kukaMasipala ekukhuliseni nasekuthuthukiseni amakhono omculo endawo.
Le khwaya yakhiwe amalungu entsha angama-22 akhethwe ngenqubo yokufuna amathalente nokuhlolwa kwamakhono ebibanjelwe kuwo wonke amadolobha angaphansi kweTheku.
Lolu hlelo lunikeze abaculi be-gospel abasafufusa ithuba lokuveza amakhono abo, kanti ngesikhathi esifanayo lwavula amathuba okwakha imisebenzi esimeme embonini yezobuciko.
Ikhwaya esanda kusungulwa ihehe izethameli ngokudlala kwayo kokuqala okuqoshiwe bukhoma obumangalisayo. Indawo yomcimbi ibigcwele phama njengoba izakhamuzi, abathandi bomculo wevangeli kanye nabalandeli behlangene ukuzobungaza ukwethulwa kwale khwaya.
Ekhuluma emcimbini wokuqoshwa bukhoma, uMqondisi Wezokungcebeleka NamaPaki kuMasipala waseThekwini, uDkt. Simphiwe Ndlovu, uthe uHlelo lwe-eThekwini Gospel Music Crescendos lwasungulwa ngenhloso yokuthola, ukukhulisa nokunika amandla abaculi abasebasha abanamakhono ngomqeqesho wobungcweti, ukuqondiswa ngabeluleki kanye namathuba okuziveza emakhonsathini nasezinkundleni zomculo.
“Njengengxenye yokuthuthukiswa kwabo, amalungu ekhwaya athole ukuqeqeshwa okuqhubekayo nokuqondiswa ngabaculi abahlonishwayo kanye nochwepheshe bemboni yomculo abawasizile ukuthuthukisa amakhono awo okucula, indlela yokuziveza esiteji kanye nokuqonda ukusebenza kwemboni yomculo. Aphinde anikezwa ukuqeqeshwa okujulile nokuzilolonga okunamandla ukuze alungiselelwe lo mcimbi obalulekile wokuqoshwa bukhoma,” kusho uDkt. Ndlovu.
Ukwethulwa ngempumelelo kanye nokuqoshwa bukhoma kuveze ngokusobala ubukhulu bamathalente akhona emiphakathini yaseThekwini futhi kwaqinisekisa futhi ukuzibophezela kukaMasipala ekutshaleni izimali kwezobuciko namasiko njengendlela yokuthuthukisa intsha, ukuqinisa ubumbano emphakathini kanye nokunikeza amathuba omnotho.
UMasipala uhalalisela amalungu ekhwaya angama-22 ngale mpumelelo futhi uwafisela inhlanhla njengoba eqala uhambo lwawo emkhakheni womculo.
IDolobha liyaqhubeka nokuzibophezela ekwakheni izinkundla ezivumela abaculi bendawo ukuthi bathuthukise amakhono abo futhi babelane ngamathalente abo nezethameli kulo lonke elaseNingizimu Afrika nangaphandle kwemingcele yalo.
