Nakuba uhambo lweBanyana Banyana kwi-Women’s Africa Cup of Nations (WAFCON) ka-2026 luphele ngemuva kokuhlulwa ngo-2-1 yiMorocco kuma-quarter-final, impumelelo yayo idlulele nangaphandle kwenkundla.
Ngohlelo lweStayfree olubizwa nge-Goals 4 Pads, amagoli ayisithupha ashaywe yiBanyana avulele amantombazane aseNingizimu Afrika amaphakethe angu-6 000 ama-sanitary pads. IStayfree, engumxhasi osemthethweni weBanyana Banyana ngama-sanitary pads, ithembise ukunikela ngamaphakethe angu-1 000 ngalo lonke igoli elishaywa yileli thimba.
Igoli lokuqala lashiywa nguLinda Motlhalo ngesikhathi iBanyana inqoba iJapan ngo-1-0 ngoNhlangulana. Amanye amahlanu ashaywe kwi-WAFCON nguBambanani Mbane, uHildah Magaia kanye noThembi Kgatlana, oshaye amagoli amathathu.
La maphedi azonikelwa ezikhungweni zebhola zabesifazane ezisemiphakathini nasemaqenjini ebhola amantombazane ezikoleni. Inhloso ukusiza amantombazane aqhubeke nokuya esikoleni, eziqeqeshweni nasemidlalweni ngaphandle kokuphazanyiswa ukuya esikhathini.
Umqeqeshi weBanyana, uDkt Desiree Ellis, uthe lolu hlelo lunikeza wonke amagoli incazelo ejulile ngoba lisiza amantombazane angenawo amandla okuthenga ama-sanitary pads.
Amagoli ayisithupha, amaphakethe angu-6 000 namathuba angenakubalwa avulekele amantombazane.
