Isimemezelo mayelana nomcimbi we KZN Namuhla Annuart Artist Awards 2026
ETHEKWINI: IKZN Namuhla Community Newspaper imema umphakathi nabathandi bezobuciko ukuba bavotele amaciko abawathandayo kuma-5th Annual KZN Namuhla Artists Awards 2026.
Umcimbi wokuklomelisa uzoba ngoMgqibelo mhla zingama-26 kuMandulo 2026 eBAT Centre, eThekwini. Amaciko aphumelele azoklonyeliswa ngezindondo, izitifiketi nemali njengendlela yokuhlonipha ikhono lawo negalelo lawo emkhakheni wezobuciko waseNingizimu Afrika.
Le miklomelo yaminyaka yonke iyinkundla yokuqhakambisa nokweseka amaciko asafufusa aqhamuka KwaZulu-Natal, eMpumalanga Kapa, eNtshonalanga Kapa, eMpumalanga, eGauteng nakwezinye izingxenye zezwe.
Kulo nyaka kuzophinde kuhlonishwe abaholi bendabuko, abaholi bezenkolo nabaholi bomphakathi ngemisebenzi yabo yokuthuthukisa imiphakathi nokuletha izinguquko ezinhle.
Umsunguli noMhleli weKZN Namuhla, uNksz. Sheila Mhlongo, uthe ukubamba iqhaza komphakathi kubalulekile empumelelweni yale miklomelo.
“Sikhuthaza abalandeli bamaciko, abathandi bomculo nomphakathi ukuba bavote, basize amaciko abawathandayo athole ukuhlonishwa okufanele. Ivoti ngalinye likhombisa ukweseka abantu abanamakhono abacebisa imiphakathi yethu ngobuciko,” kusho uMhlongo.
Le miklomelo iholwa yindikimba ethi: “Sibungaza amaciko ethu ngesithunzi.” Ukusingathwa kwayo ngeNyanga Yamagugu kukhombisa ukuzibophezela kweKZN Namuhla ekuvikeleni amasiko nasekuhlonipheni abantu abagcina amagugu esizwe.
IKZN Namuhla, eyasungulwa ngoMandulo 1998, izobe igubha iminyaka engama-28 kulo nyaka. Isibeke amaciko asafufusa eqhulwini ngokuwanikeza indawo yokwethula imisebenzi yawo emphakathini.
Iminyango kahulumeni, omasipala, amabhizinisi nabezindaba bayamenywa ukuba basekele lolu hlelo.
Ukuvota kuvalwa: NgeSonto, 20 kuMandulo 2026
Umcimbi: NgoMgqibelo, 26 kuMandulo 2026
Indawo: BAT Centre, eThekwini
Imininingwane: 076 390 6969 | editor.kznnews@gmail.com
