U-Cia Siwela Ingoma yakhe entsha ethi Ebumnyameni, ezophuma mhla zingama-23 kuMfumfu 2026, ihlanganisa isigqi se-Afro-House nomyalezo ojulile ngokholo, ingokomoya, izinselelo zempilo kanye nokufuna ukukhanya phakathi kobumnyama.
SHEILA MHLONGO | KZN NAMUHLA
EGOLI: Umculi waseNingizimu Afrika, uCia Siwela, ulungiselela ukukhipha ingoma yakhe entsha ethi Ebumnyameni, ehlose ukuthinta izinhliziyo zabathandi bomculo ngokuletha umyalezo womthandazo, ukuphulukiswa komphefumulo, ithemba kanye nokubaluleka kokholo ngezikhathi zobunzima.
Le ngoma, okulindeleke ukuthi ikhishwe mhla zingama-23 kuMfumfu 2026, iyisiqalo somsebenzi womculo ozokwethulwa ngezingxenye ezimbili, lapho lo mculi ehlanganisa khona isigqi somculo we-Afro-House nemiyalezo ejulile ethinta impilo yomuntu, ingokomoya kanye nokufuna indlela yokuphuma ezimweni ezinzima.
Ngale ngoma, uSiwela uhlose ukukhuthaza abantu ukuthi bangazesabi izikhathi zobumnyama ezimpilweni zabo, kodwa bazamukele njengengxenye yohambo lokuzithola, lokukhula nokufuna ukukhanya.
Ingoma egxile emthandazweni nasekutholeni ithemba
Ingqikithi yengoma ethi Ebumnyameni isekutheni umuntu kufanele aqale avume isimo abhekene naso ngaphambi kokuba athole indlela yokusinqoba.
Le ngoma iqala ngomqondo ojulile othi: “Ngisebumnyameni.”
Lawa mazwi aveza isimo umuntu angazithola ekuso lapho ebhekene nobunzima, ukudideka, usizi noma ukungabi nazimpendulo ngezinkinga ezimkhungethe.
Esikhundleni sokuthi umuntu aphuthume ukufuna izixazululo, le ngoma imkhuthaza ukuthi aqale aqonde futhi amukele isimo akuso, ngoba lokho kungaba yisinyathelo sokuqala sokuthola indlela eya ekukhanyeni.
Umyalezo wale ngoma uthinta abantu ababhekene nezikhathi ezinzima, abafuna ukuthula komphefumulo, izimpendulo zemibuzo yempilo kanye nokuxhumana okujulile noMdali.
Ukuhlanganisa umculo, amasiko nengokomoya
Okugqamayo ngale ngoma indlela uSiwela asebenzisa ngayo umculo we-Afro-House ukuhlanganisa umthandazo, ingokomoya kanye nokunyakaza komzimba ngokudansa.
Ingoma igxile nasemandleni okuhuba nokucula njengendlela yokuxhumanisa umuntu nezinto ezingokomoya.
Iphinde iveze izindlela ezahlukene abantu abamnyama baseNingizimu Afrika abaxhumana ngazo noMdali, kungaba ngokukhuleka kuNkulunkulu, ngokulandela izinkolelo zabo ezingokomoya noma ngokugcina amasiko ahlobene nokuhlonipha amadlozi.
Nokho, le ngoma ayiphoqeleli abalaleli ukuthi babe nombono owodwa ngengokomoya, kodwa ibanika ithuba lokuthi umuntu ngamunye azitholele umyalezo ohambisana nezinkolelo zakhe kanye nalokho abhekene nakho empilweni.
USiwela ukholelwa ukuthi umculo ungaba yindlela yokuletha abantu ndawonye, ubakhuthaze ukuba bazindle, bathole ukuthula futhi baveze imizwa yabo ngokucula nangokudansa.
USiwela uzwakalisa injabulo nokukhathazeka ngokukhishwa kwengoma
Ekhuluma ngokulungiselela ukwethula le ngoma emphakathini, uSiwela uthe ujabule kakhulu kodwa ngesikhathi esifanayo unokukhathazeka ngendlela umyalezo wayo ozokwamukelwa ngayo.
“Ngijabule kakhulu kodwa nginovalo ngesikhathi esifanayo ngokukhishwa kwale ngoma. Kube yinto enhle kakhulu ukuyiqopha nokuyakha. Ngiyethemba ukuthi umyalezo wayo uzofinyelela kubantu abaningi futhi uvuse izingxoxo ezibalulekile mayelana nokuthi singobani, sithandaza kanjani nokuthi umdanso uyiyiphi ingxenye yezimpilo zethu,” kusho uSiwela.
Uthe ufisa ukuthi abantu bangagcini nje ngokujabulela isigqi sengoma, kodwa baphinde bacabangisise ngomyalezo ewuphethe.
Umculo njengendlela yokwelapha umphefumulo
Ngokusebenzisa ingoma ethi Ebumnyameni, uSiwela uphinde agqamise ukubaluleka komculo njengendlela abantu abangaveza ngayo imizwa yabo, bathole induduzo futhi bakhe ithemba.
Ingoma ikhuthaza abalaleli ukuthi bazibuze ukuthi ingokomoya linayiphi indawo ezimpilweni zabo nokuthi umthandazo, ukuhlabelela, ukuhuba kanye nokudansa kungabasiza kanjani ekubhekaneni nezinselelo zansuku zonke.
Lo msebenzi womculo uyisigaba sokuqala sohlelo olunezingxenye ezimbili, oluzoqhubeka nokuhlola ubudlelwano phakathi komthandazo, ukuphulukiswa komphefumulo, ukuzazi kanye nendlela umculo ongaba ngayo yindlela yokuziveza.
Ngokuhlanganisa isigqi esihehayo se-Afro-House nomyalezo ojulile, uSiwela uhlose ukudala umculo ongagcini ngokujabulisa abantu kuphela, kodwa obuye ubakhuthaze ukuba bazindle ngezimpilo zabo.
Ingoma izotholakala ezinkundleni zomculo zedijithali
Ingoma ethi Ebumnyameni izotholakala ezinkundleni ezinkulu zokusakaza nokulalela umculo ku-inthanethi kusukela mhla zingama-23 kuMfumfu 2026.
Kulindeleke ukuthi le ngoma ihehe abathandi bomculo we-Afro-House kanye nalabo abathanda izingoma ezinemiyalezo yokholo, ithemba nokukhuthaza abantu ukuba bangapheli amandla lapho bebhekene nobunzima.
Umyalezo omkhulu wale ngoma uthi: Ngisho noma umuntu ezithola esebumnyameni, akusho ukuthi ukukhanya sekuphelile. Ngethemba, umthandazo nokuzimisela, umuntu angakwazi ukuthola indlela yokuqhubekela phambili.
