Abezicishamlilo boMnyango Wezomlilo Nezimo Eziphuthumayo kuMasipala weTheku (eThekwini Fire and Emergency Services) bahlenge owesifazane obevaleleke ngaphakathi esontweni ngesikhathi kuqubuka umlilo oshise ibhilidi elinezitezi ezimbili, elisekhoneni lika-Umbilo Road no-Che Guevara Road, ngoLwesithathu kusihlwa, mhla ziyi-14 kuMfumfu 2026.
Isikhungo sikaMasipala esamukela izingcingo zezimo eziphuthumayo sithole umbiko ngalo mlilo ngezithuba zabo-20h20, kwabe sekuthunyelwa abezicishamlilo ngokushesha endaweni yesigameko.
Ngesikhathi befika, bathole ukuthi zombili izitezi zebhilidi zase zigqamuka amalangabi.
Isitezi esingaphansi sisetshenziswa yibhizinisi elifaka futhi lilungise amathayi ezimoto, lapho kugcinwa khona nenqwaba yamathayi, kanti isitezi esiphezulu sisetshenziswa njengesonto.
Naphezu kokushisa okukhulu, intuthu eshubile kanye nezinto ezivutha kalula ebezingaphakathi kuleli bhilidi, abezicishamlilo bangene ngaphakathi bakwazi ukuhlenga owesifazane obevaleleke esontweni.
Owesifazane uthole usizo lokuqala endaweni yesigameko ngenxa yokuhogela intuthu, ngaphambi kokuba aphuthunyiswe esibhedlela ukuze athole okunye ukwelashwa.
Abezicishamlilo bakwazile ukunqanda umlilo kungakapheli imizuzu eyishumi befikile, baphinde bavimbela ukuthi ungasabalaleli kwezinye izakhiwo ezingomakhelwane.
Akubikwanga muntu oshonile noma abanye abantu abalimele ngenxa yalesi sigameko.
KUSOLWA UKUTHI UMLILO UNGASE UBE UQALWE NGAMABOMU
Imbangela yalo mlilo isaphenywa.
Ulwazi lokuqala olutholakele luveza izinsolo zokuthi kungenzeka kube khona umuntu ophonse into eyenzelwe ukuqhumisa noma ukubhula umlilo kuleli bhilidi.
Nokho, lezi zinsolo azikaqinisekiswa, njengoba abaphenyi bezomlilo besaqhubeka nophenyo endaweni yesigameko ukuze kutholakale ukuthi umlilo uqale kanjani nokuthi uqhamuke kuphi.
UMasipala weTheku unxusa izakhamuzi kanye nabanikazi bamabhizinisi, ikakhulukazi labo abagcina izinto ezivutha kalula, ukuba baqinisekise ukuthi zonke izindlela zokuphepha emlilweni ziyalandelwa ukuze kuvikelwe izimpilo zabantu kanye nempahla.
Umphakathi uyakhuthazwa ukuba ubike imililo kanye nezinye izimo eziphuthumayo ngokushayela isikhungo sezimo eziphuthumayo sikaMasipala kule nombolo:
031 361 0000
Noma ngubani onolwazi olungasiza ophenyweni lwalesi sigameko uyacelwa ukuba axhumane namaphoyisa aseNingizimu Afrika (SAPS).
Umthombo: Uphiko Lwezokuxhumana Nokumaketha kuMasipala weTheku.
IZITHOMBE
Abezicishamlilo boMasipala weTheku banqande inhlekelele enkulu ngesikhathi kuqubuka umlilo ebhilidini elinezitezi ezimbili ekhoneni lika-Umbilo Road no-Che Guevara Road. Owesifazane obevaleleke ngaphakathi ebhilidini eligcwele intuthu uhlengiwe waphuthunyiswa esibhedlela, kanti abezicishamlilo bakwazile ukuvimba ukuthi umlilo ungasabalaleli kwezinye izakhiwo ezingomakhelwane.
