THOBILE MBATHA
Ukungcola komoya kubeka izingane ezingakazalwa engcupheni kanti omama abakhulelwe abahlala ezindaweni ezingcoliswe umoya eNingizimu Afrika basengozini yokuzala ingane enenkinga yokuzalwa engaqondakali ikakhulukazi i-orofacial cleft lip and palate (CLP).
Bathe, Lokhu kuvele ngokocwaningo olwenziwe yiSouth African Medical Research Council (SAMRC) ngokubambisana nodokotela abahlinzayo, abacwaningi kanye ne-Operation Smile.Ucwaningo abalwenze ekuqaleni kwenyanga ka-febhuwari ochungechungeni lweClimate Child Health Series: The Impact of Climate Change on Newborn Health Outcomes ebanjwe ku-inthanethi yi-US Child Health Task Force kanye ne-United Nations International Children's Emergency Fund (UNICEF).
Ngokusho kwe-SAMRC, lolu cwaningo luhlanganisa amacala eziguli ezine-CLP kusukela ngo-2006 kuya ku-2020. Kususelwa ezinqolobaneni ezimbili zolwazi, kwacutshungulwa amacala angu-2 515 mayelana nokungcoliswa komoya endaweni okuhlala kuyo omama abakhulelwe.
USolwazi oyiChief Scientist ophikweni loCwaningo lwezeMvelo nezeMpilo kwaSAMRC, uDkt Caradee Wright, uthe: “Amazinga okungcola komoya ayaziwa ukuthi aphakeme eNingizimu Afrika, aqhamuka eziteshini zikagesi eziphehlwa ngamalahle, izimoto, ukushiswa kukaphethiloli ezindlini, izimayini, izimboni nokunye.”
“Kudingeka kunikezwe omama ulwazi mayelana nezingozi zokungcola komoya okungaba nazo enganeni yabo engakazalwa ikakhulukazi ngesikhathi sokukhulelwa ngaphambi kwesikhathi, ngakho-ke kubalulekile ukuthi uma umuntu efuna ukukhulelwa azame ukunciphisa ukungcoliswa komoya.”esho
