WONDER NGCOBO
UNgqongqoshe womnyango wezokuBusa ngokuBambisana neziNdaba zoMdabu kwaZulu Natal uMfundisi Thulasizwe Buthelezi usedlulise okukhulu ukukhathazeka ngemibiko yabezindaba lapho kubikwa ukuthi kunemali elinganiselwa ku R37 Million wamarandi owamila izinyawo kwi-account yoMkhandlu wakwa Dukuza Local Municipality. Lemibiko esisabalele kangangoba seyize yaletha okukhulu ukukhathazeka emphakathini.
Empendulweni yalezinsolo uMphathiswa Buthelezi usebhalele oyiMeya yomkhandlu wakwaDukuza Local Municipality uKhansela Muzi Ngidi efuna umbiko ngalezizinsolo . Lombiko uzobe uqukethe izinyathelo ezinqala okumele zithathwe nguMphathiswa ngaloludaba.
Umphathiswa uButhelezi ufisa ukuqinisekisa abahlali bakwaDukuza ukuthi umnyango uzoqinisekisa ukuthi lezinsolo uzozithathela phezulu, aqinisekise ukuthi bathola isithunzi nezimpendulo abazidingayo.
Ngokodaba olushicilelwe kwelinye lamaphephandaba esingisi ngomhlaka-17 Febhuwari iCaxton News online, luthi lesamba semali engu R37. 7 million,sakhishwa ngokuphazima kweso emizuzwini engu 45 ngosuku lomhlaka 31 Januwari 2025 kwibhange le ABSA. Kanti uMasipala iKwaDukuza usuyalele inkampani ezimele ukuthi iphenye ngaloludaba ukuthi lemali engaka yashonaphi.
Leliphephandaba liqhuba lithi nakuba sekuphele ngaphezu kwamaviki amabili lemali yanyamalala kodwa akukho lutho oluzwakalayo ukuthi ingabe uphenyo seluhambe lwafikaphi, ngisho nasemuva kwesitatimende esakhinshelwa abezindaba ngomhlaka 6 Febhuwari, sivela kuNgqongqoshe wezokuBusa ngokuBambisana nezindaba zoMdabu uMfundisi Thulasizwe Buthelezi lapho wayezwakalise ukuthi kumele kuthathwe izinyathelo ngaloludaba.
