U-MEC Buthelezi ekhuluma phambi kwezinkumbi zamalunga ebandla lamaNazaretha eBuhleni eNanda
ETHEKWINI: UNgqongqoshe woMnyango wezokuBusa ngokuBambisana neziNdaba zoMdabu KwaZulu-Natal (CoGTA), uMhlonishwa Thulasizwe Buthelezi, ngoLwesihlanu lomhlaka 17 uvakashele ngokusemthethweni iBandla lamaNazaretha eBuhleni njengengxenye yomkhankaso oqhubekayo womnyango wokunqanda izinhlekelele nokufundisa umphakathi ngezindlela zokuzilungiselela esifundazweni.
Ukuvakasha kuqale ngomhlangano wangasese osezingeni eliphezulu phakathi kukaMEC Buthelezi noBungcwele Bakhe, iNkosi uNyazi lweZulu. Kulo mhlangano kudingidwe ukusebenzisana kwamasu okuphepha komphakathi, ukumelana nemithelela yokuguquguquka kwesimo sezulu kanye nokulungela izinhlekelele emibuthanweni emikhulu.
Ngemva komhlangano wangasese, uMEC ukhulume namakhulu amalungu ebandla abebuthene entabeni engcwele, eqinisekisa ukuzibophezela kukahulumeni wesifundazwe ekwesekeni izinhlaka zomphakathi ngezikhathi zobunzima.
“Njalo siyohlala siseduze nani, sisebenzisana nani ngokubambisana,” kusho uMEC Buthelezi ngesikhathi ekhuluma namalungu ebandla. “Sinifisela konke okuhle kulesi sikhathi. INkosi inibusise.”
Njengengxenye yosizo olubambekayo oluhambisana nomkhankaso wokuqwashisa ngezinhlekelele, uMEC Buthelezi uhole uhlelo lokwabiwa kwezingubo zokulala kanye nezinye izidingo ezibalulekile zosizo kumalungu ebandla. Lokhu kunikezelwa kuyingxenye yesu lomnyango lokubhekana nezimo zezinkathi zonyaka, okuhloswe ngalo ukweseka imiphakathi esengcupheni nokunciphisa umthelela wezimo zezulu ezinzima esifundazweni sonke.
UMnyango wezokuBusa ngokuBambisana neziNdaba zoMdabu uzoqhubeka nokuhambisa le mikhankaso eqondene nokuqwashisa umphakathi, ngokubambisana nabaholi bezenkolo nabaholi bendabuko, ukuze kuqinisekiswe ukuthi izexwayiso zangaphambi kwesikhathi kanye nemigomo yezokuphepha kufinyelela kuzo zonke izindawo zaKwaZulu-Natal.
