UNgqongqoshe Wezasekhaya, uLeon Schreiber, uthe kulindeleke ukuthi lolu hlelo luqale ukusebenza mhla ziyi-10 kuLwezi (November) 2026.

Ngu-SHEILA MHLONGO

UMnyango Wezasekhaya eNingizimu Afrika (Home Affairs) umatasa nokusungula uhlelo olusha lwezobuchwepheshe oluzokwenza kube lula futhi kusheshe ukucutshungulwa kwezicelo zabantu bokufika abafuna ukukhoseliswa nokuvikelwa kuleli zwe.

Lolu hlelo luzosebenzisa imininingwane yomuntu ehlukile, efana nezigxivizo zeminwe kanye neminye imininingwane yokuhlonza umuntu (biometric information), ukuze kuqinisekiswe ubunikazi babafaka izicelo nokuvimbela ukusetshenziswa budedengu kohlelo lokukhoseliswa.

UNgqongqoshe Wezasekhaya, uLeon Schreiber, uthe kulindeleke ukuthi lolu hlelo luqale ukusebenza mhla ziyi-10 kuLwezi (November) 2026.

USchreiber ubekhuluma esithangamini sabezindaba seKomidi Longqongqoshe Elibhekelele Ezokufuduka (Inter-Ministerial Committee on Migration – IMC), ePitoli ngeSonto.

Uthe uhulumeni uhlose ukusebenzisa ubuchwepheshe ukulungisa izinkinga osekunesikhathi eside zikhona ohlelweni lokucutshungulwa kwezicelo zabantu abafuna ukukhoseliswa kuleli, ngesikhathi esifanayo eqinisa ukulandelwa kwemithetho yezokufuduka.

UNgqongqoshe uthe lolu hlelo luzosebenzisa ulwazi uMnyango osulutholile ekuthuthukiseni ezinye izinsiza zawo zobuchwepheshe, okuhlanganisa nohlelo lwe-Electronic Travel Authorisation.

Uhlelo olusha luzosebenza kanjani?

Ngaphansi kwalolu hlelo, abantu abafaka izicelo zokukhoseliswa kuzodingeka banikeze imininingwane yabo yokuhlonza esebenzisa ubuchwepheshe be-biometric.

Lokhu kuzosiza uMnyango Wezasekhaya ukuthi ukwazi:

• Ukuqinisekisa ubunikazi bangempela babafaka izicelo.
• Ukuthola ukuthi umuntu wake wafaka yini isicelo sokukhoseliswa kodwa senqatshwa.
• Ukuhlola ubuqiniso bamaphasipoti kanye neminye imibhalo yokuhamba.
• Ukuthola ukuthi umfakisicelo wake wephula yini imithetho yezokufuduka.
• Ukuvimbela abantu asebenqatshiwe ukuthi baphinde bafake izicelo ngokuphindaphindiwe ngenhloso yokubambezela ukubuyiselwa emazweni abo.

USchreiber ugcizelele ukuthi inhloso akukhona ukuvimba abantu abafanele ukuthola ukuvikelwa, kodwa ukuqinisekisa ukuthi izicelo zicutshungulwa ngendlela esheshayo, efanele futhi ehambisana nomthetho.

Uthe isinqumo seNkantolo Yomthethosisekelo asiwuphucanga uMnyango Wezasekhaya amandla okunquma ukuthi umuntu uyafaneleka yini ukuthola ukukhoseliswa.

Uma umuntu engahlangabezani nemibandela edingekayo, uMnyango usenawo amandla okwenqaba isicelo sakhe nokumxosha kuleli, ngokulandela izinqubo zomthetho.

UNgqongqoshe uphinde wacacisa ukuthi isinqumo seNkantolo Yomthethosisekelo sangomhla ziyisi-7 kuNtulikazi 2026 sasiphathelene nezinqubo zokucutshungulwa kwezicelo zokukhoseliswa.

Leso sinqumo asisho ukuthi bonke abantu bokufika sebethole ilungelo lokuba ngababaleki noma lokuba yizakhamuzi zaseNingizimu Afrika.

Izicelo zokudlulisa amacala ezingaba ngu-120 000 zisalinde ukucutshungulwa

Enye yezinselelo ezinkulu uMnyango Wezasekhaya obhekene nazo yisibalo esikhulu sezicelo zokudlulisa amacala zabantu abanqatshiwe ukukhoseliswa, abafuna ukuthi izinqumo zabo zibuyekezwe.

USchreiber ulinganisele ukuthi kunezicelo ezingaba ngu-120 000 ezisalinde ukucutshungulwa, nakuba ethe uMnyango usazohlinzeka ngesibalo esiqinisekisiwe.

Uveze ukuthi uMnyango usukwazile ukwehlisa lesi sibalo ngamaphesenti angaba ngu-20 onyakeni wezimali odlule.

Nokho, uthe kusadingeka kwenziwe umsebenzi omkhulu ukuqinisekisa ukuthi izicelo ezintsha azidali okunye ukunqwabelana kwamacala.

Ngokusho kukaSchreiber, uMnyango usukwazi ukucubungula izicelo zokuqala zokukhoseliswa esikhathini esilinganiselwa ezinsukwini ezingama-30.

Inkinga enkulu isesigabeni sokudlulisa amacala, lapho abantu abangagculisekile ngezinqumo ezithathiwe becela ukuthi izicelo zabo ziphinde zibhekwe.

Ukuze kubhekwane nale nkinga, uMnyango usuqashe abameli abangama-74 (advocates) abazosebenza ekusheshiseni ukucutshungulwa kwalezi zicelo.

UNgqongqoshe uthe ngesikhathi uhulumeni okhona eqala ukusebenza, kwakunabantu abayisishiyagalolunye kuphela ababebhekelele ukucutshungulwa kwezicelo zokudlulisa amacala.

Uthe ukwandiswa kwabasebenzi bezomthetho kanye nokusetshenziswa kobuchwepheshe obusha kulindeleke ukuthi kube nomthelela omkhulu ekunciphiseni ukubambezeleka.

Uhulumeni uzocela iNkantolo Yomthethosisekelo ukuthi icacise indlela okumele kulandelwe ngayo isinqumo sayo

Khonamanjalo, uhulumeni uhlela ukubuyela eNkantolo Yomthethosisekelo ukuze acele umyalelo wokwengamela ukuqaliswa kwesinqumo sayo.

Lokhu kuhloswe ngakho ukuthola isiqondiso esicacile sokuthi uMnyango Wezasekhaya kufanele usisebenzise kanjani lesi sinqumo, kubhekwa nezinselelo ezikhona kwezokuphatha kanye nokusebenza koMnyango.

USchreiber uthe kubalulekile ukuthi uhulumeni aqale athole isibalo sabantu okulindeleke ukuthi bafake izicelo zokukhoseliswa, ukuze ukwazi ukuhlela kahle inani labasebenzi, izinsiza kanye nezindlela zokucubungula izicelo.

Uhlelo olusha lwe-inthanethi luzosiza uhulumeni ukuthi athole ulwazi oluqondile ngenani lezicelo okufanele abhekane nazo, bese ehlela ukuqaliswa kwezinguquko ngezigaba.

Kulindeleke ukulalelwa kodaba enkantolo mhla zingama-29 kuMfumfu

IKomidi Longqongqoshe Elibhekelele Ezokufuduka seliyalele iminyango kahulumeni kanye nezinhlaka ezifanele ukuthi zibambe iqhaza ekulalelweni kodaba enkantolo mhla zingama-29 kuMfumfu (October) 2026.

Lolu daba luzolalelwa yithimba lamajaji eNkantolo Ephakeme yaseGauteng.

Inhloso yalokhu kulalelwa ukuhlola izinqumo zezinkantolo ezingahambisani ezake zakhishwa ngaphakathi kwalesi sigaba senkantolo mayelana nabantu abafuna ukukhoseliswa.

USchreiber ukuqinisekisile ukuthi uMnyango Wezasekhaya uzoqhubeka nokucubungula izicelo zabafuna ukukhoseliswa, ngesikhathi esifanayo uqinisekisa ukuthi imithetho yezokufuduka iyalandelwa.

Lokhu kuhlanganisa nokubuyiselwa emazweni abo kwabantu izicelo zabo zokukhoseliswa esezinqatshiwe ngokuphelele, ngokulandela izinqubo zomthetho ezifanele.

Uhulumeni uthi lezi zinguquko zihlose ukwenza uhlelo lokukhoseliswa lusebenze ngokushesha nangempumelelo, ngaphandle kokwephula amalungelo abantu noma izinqumo zeNkantolo Yomthethosisekelo.

Umthombo: SAnews.gov.za – 11 Okthoba 2026 Ihlelwe ngesiZulu: KZN Namuhla Community Newspaper