Amazwibela esithombe (Photo Caption)–Ukwethulwa kwe-HQ Sibaya kuphawula elinye igxathu elibalulekile ekukhuleni nasekuthuthukisweni kwendawo yaseSibaya Coastal Precinct, okuqhubeka nokuqinisa isikhundla seTheku njengendawo ehamba phambili ekuheheni abatshalizimali nasekukhuliseni amabhizinisi.
SHEILA MHLONGO
ETHEKWINI: UMasipala weTheku ukwamukele ukwethulwa kwe-HQ Sibaya, okuyiphrojekthi yokwakhiwa kwamahhovisi ezentengiselwano ebiza amarandi ayizigidi ezingama-250 (R250 million), endaweni yaseSibaya Coastal City. Lo Masipala uthi lolu tshalomali luyigxathu elibalulekile ekukhuliseni umnotho weDolobha.
Inkampani iDevmco Group, engumthuthukisi omkhulu wendawo yaseSibaya, yethule ngokusemthethweni le phrojekthi yokwakhiwa kwamahhovisi asezingeni eliphezulu anendawo engamamitha-skwele ayizi-7 000 ngoLwesibili, mhla ziyi-10 kuLwezi 2026.
Le phrojekthi itholakala kuHeleza Boulevard, phakathi kwaseMhlanga, eMdloti kanye naseKing Shaka International Airport.
Iyingxenye yezinhlelo eziqhubekayo zokuthuthukisa iSibaya ibe yindawo yesimanje ehlanganisa izindawo zokuhlala, amahhovisi, izitolo, amabhizinisi kanye nezindawo zokungcebeleka.
Ngokusho kwenkampani ethuthukisa le ndawo, kulindeleke ukuthi le phrojekthi ikhiqize umthelela wezomnotho olinganiselwa ezigidini ezingama-500 zamarandi (R500 million), ngokwezibalo ezisekelwe endleleni yoMgcinimafa Kazwelonke yokulinganisa umthelela wokutshalwa kwezimali emnothweni.
Kulindeleke nokuthi le ntuthuko yenyuse imali engena kuMasipala ngezintela zezakhiwo ngemali elinganiselwa ezigidini eziyisi-8 zamarandi (R8 million) ngonyaka.
KULINDELEKE UKUDALWA KWAMATHUBA OMSEBENZI ANGAMA-770
Inkampani iDevmco Group ilinganisela ukuthi kuzodaleka amathuba omsebenzi esikhashana angama-750 ngesikhathi sokwakhiwa kwale phrojekthi, bese kudaleka eminye imisebenzi engama-20 yesikhathi eside lapho isikhungo sesisebenza ngokugcwele.
Ngokusho kwenkampani, amaphesenti angama-75 ezindawo ezitholakalayo asevele athengisiwe, kanti kulindeleke ukuthi wonke amahhovisi abe esesetshenziswa kungakapheli unyaka wokuqala kuqedwe ukwakhiwa.
Ekhuluma emcimbini wokwethulwa kwale phrojekthi, iMenenja yeDolobha leTheku, uMusa Mbhele, ithe le ntuthuko ikhombisa ukuzibophezela kukaMasipala ekukhuthazeni ukukhula komnotho ngokudonsa abatshalizimali kanye nokudala amathuba omnotho esimeme.
UMbhele uthe: “I-HQ Sibaya ingaphezu kokuba yiphrojekthi entsha yokwakhiwa kwamahhovisi. Iwutshalomali ekusaseni leDolobha lethu futhi iyisisusa sokukhula komnotho.
“Amaphrojekthi alolu hlobo aheha amabhizinisi, adale amathuba omsebenzi, andise imali engena kuMasipala ngezintela zezakhiwo futhi aqinise amandla omnotho wesifunda sethu ukuze ukwazi ukuncintisana.
“Ngokusebenzisana ngendlela ehlelekile nezinkampani ezizimele, sakha izindawo zasemadolobheni eziphilayo nezihlanganisa imisebenzi eyahlukene, ezeseka ukutshalwa kwezimali, ukusungulwa kwezindlela ezintsha kanye nokuchuma komnotho esikhathini eside,” kusho uMbhele.
ISIBAYA IYAQHUBEKA NOKUTHUTHUKA
UMqondisi Ophethe weDevmco Group, uSchalk Theunissen, uthe i-HQ Sibaya iyisinyathelo esibalulekile ekwakheni idolobha eliphelele elisogwini lolwandle.
UTheunissen uthe: “I-HQ Sibaya iphawula ukuqala kokuthuthukiswa kwesikhungo sezamabhizinisi futhi ivula amanye amathuba okuba abantu bakwazi ukusebenza nokuhlala ngaphakathi kwedolobha elilodwa elisogwini.
“Njengoba iSibaya iqhubeka nokuthuthuka, ingxenye ngayinye entsha iqinisa umbono omkhulu wokwakha indawo ehlanganisa izindawo zokuhlala, ezamabhizinisi, izitolo kanye nezindawo zokungcebeleka ezisebenzisana ngokuhlanganyela.”
Ukwakhiwa kwesakhiwo esikhulu samahhovisi kuzoqala uma sekuqediwe imisebenzi yokulungiswa komhlaba.
Kulindeleke ukuthi yonke le phrojekthi iphothulwe phakathi kwezinyanga ezintathu zokugcina zonyaka wezi-2027.
UMasipala weTheku uthi uzoqhubeka nokusebenzisana nezinkampani ezizimele ukuheha abatshalizimali, ukweseka ukudalwa kwamathuba omsebenzi kanye nokufeza umbono wawo wokuba yiDolobha lase-Afrika elinakekela abantu balo kakhulu nelikulungele ukuphila kulo ngowezi-2030.
Umthombo: Uphiko Lwezokuxhumana Nezokumaketha kuMasipala weTheku (eThekwini Municipality Communications and Marketing Directorate).
Top of Form
Bottom of Form
