IMenenja yeDolobha leTheku, uMusa Mbhele, ihlangane nabamele amaqembu ezombusazwe
SHEILA MHLONGO
ETHEKWINI: Imenenja yeDolobha leTheku, uMusa Mbhele, ihlangane nabamele amaqembu ezombusazwe ngoLwesithathu, mhla ziyi-11 kuNovemba 2026, kulandela ukumenyezelwa kwemiphumela yoKhetho Lohulumeni Basekhaya luka-2026 yiKhomishini Yokhetho Ezimele (IEC).
Lo mhlangano ububanjwe ngokuhambisana noMthetho Wezinhlaka Zomasipala, ka-1998 (Local Government: Municipal Structures Act), njengoba uchitshiyelwe.
Inhloso yalo mhlangano bekuwukuchazela abamele amaqembu ezombusazwe ngezinqubo zokuphatha nezokubusa okufanele zilandelwe ngaphambi komhlangano wokuqala woMkhandlu omusha osanda kukhethwa.
Kuphinde kwachazwa ngezinhlelo okufanele zenziwe ukuze kusungulwe uMkhandlu wesithupha wentando yeningi kuMasipala weTheku, ozosebenza kusukela ngowezi-2026 kuya kowezi-2031.
Ekhuluma nabebethamele umhlangano, uMbhele ugcizelele ukubaluleka kweTheku emnothweni wezwe, waveza ukuthi lo Masipala usalokhu ungowesibili ngobukhulu ekufakeni isandla emkhiqizweni ophelele waseNingizimu Afrika (GDP).
Uthe nakuba uMasipala uke wabhekana nezinselelo ezinkulu, okubalwa kuzo izikhukhula ezadala umonakalo omkhulu, ikakhulukazi ezangowezi-2022, uqhubekile nokwenza ngcono ukuhlinzekwa kwezidingo zomphakathi kanye nokuphathwa kweDolobha.
Uveze nokuthi ucwaningo lwakamuva lokwaneliseka kosomabhizinisi lukhombise ukuthuthuka ngamaphesenti angama-30.
UKUBHALISWA NOKUQEQESHWA KWAMAKHANSELA AMASHA
Enye yezinto ezibalulekile okuxoxwe ngazo kube ukubhaliswa nokulungiselelwa kwamakhansela asanda kukhethwa ukuze aqale umsebenzi wawo.
Abamele amaqembu ezombusazwe batshelwe ukuthi wonke amakhansela azothola amaphakethe aqukethe imibhalo yokubhalisa kanye nolwazi olubalulekile.
Kuzophinde kuqinisekiswe ukuthi amagama amakhansela abhalisiwe ayahambisana nohlu olusemthethweni olushicilelwe kuGazethi ye-IEC.
Njengengxenye yalolu hlelo, amakhansela kuzodingeka agcwalise amafomu okudalula izintshisekelo zawo, okubalwa kuwo imininingwane edalulwa emphakathini kanye naleyo egcinwa iyimfihlo.
Kuzokwakhiwa nesizindalwazi esiphelele samakhansela azosebenza esikhathini sowezi-2026 kuya kowezi-2031, kuqinisekiswe ukuthi yonke imininingwane yabamele umphakathi abakhethiwe ihambisana nemiphumela esemthethweni yokhetho.
UMbhele uthe kubalulekile ukuhlolwa kwamakhono amakhansela kanye nezidingo zawo zokuqeqeshwa ukuze akwazi ukwenza imisebenzi yawo ngokuhambisana noMthethosisekelo neminye imithetho yezwe.
Uthe: “Sizohlola amakhono abaholi bethu, bese kuthi lapho kunesidingo khona, sihlinzeke ngezinhlelo zokuqeqesha nokuthuthukisa amakhono. Inhloso yethu ukuqinisekisa ukuthi wonke amakhansela anolwazi namakhono adingekayo ukuze enze imisebenzi yawo ngendlela efanele futhi afake isandla esibonakalayo ekuthuthukisweni kweDolobha lethu.”
IZINHLELO EZIBALULEKILE ZOMKHANDLU OMUSHA
Umhlangano uphinde wadingida izinhlelo zokuphatha nokuhlela okuzofanele zibhekwe uMkhandlu omusha ezinyangeni ezizayo.
Lezi zinhlelo zibandakanya:
- Ukwakhiwa nokubuyekezwa koHlelo Oludidiyelwe Lokuthuthukiswa Komasipala (Integrated Development Plan – IDP).
- Ukucutshungulwa nokugunyazwa kwesabelomali sikaMasipala sonyaka wezimali wezi-2027/28.
- Ukwakhiwa koHlelo Lokusebenza Lokulethwa Kwezidingo Nokusetshenziswa Kwesabelomali (Service Delivery and Budget Implementation Plan – SDBIP).
Lezi zinhlelo ezintathu zibalulekile ekuqinisekiseni ukuthi izidingo zomphakathi ziyahlinzekwa nokuthi izinhlelo zentuthuko ziyasetshenziswa kuzo zonke izindawo ezingaphansi kukaMasipala weTheku.
UMbhele ugcizelele ukuthi abaphathi bakaMasipala bazibophezele ekusebenzisaneni noMkhandlu omusha ukuze kuqinisekiswe ukuthi ushintsho lokungena kwamakhansela amasha ezikhundleni lwenzeka ngaphandle kwezingqinamba.
Uthe uMasipala uzoqhubeka nokweseka amakhansela ukuze akwazi ukufeza izibopho zawo zokusebenzela nokuthuthukisa imiphakathi yaseThekwini.
Umthombo: Uphiko Lwezokuxhumana Nezokumaketha kuMasipala weTheku (eThekwini Municipality Communications and Marketing Directorate).
