SHEILA MHLONGO
Abomndeni waseNdlunkulu kaZulu sebekhiphe isitatimende esichitha ukubekwa kukaMfundisi uThulasizwe Buthelezi oyiMeya yas’Ondini esikhundleni sokuba uNdunankulu kaZulu.
Lokhu kuza ngemuva kokuthi ngomhlaka 27 Januwari, 2024 ngosuku lokukhunjulwa kwempi yaseSandlwana, Isilo uMisuzulu kaBhekuzulu saqoka uMfundisi uThulasizwe Buthelezi ukuthi athathe isikhundla sokuba uNdunakulu kaZulu kanye nePhini lakhe Inkosi uPhathisizwe Chiliza. Lesikhundla
esabe siphethwe uMntwana waKwaPhindangene Inkosi Mangosuthu Buthelezi ekhothame nyakenye,
Ngokwesitatimende esithunyelwe kwabezindaba ngoLwesibili lomhlaka 5 Febhuwari, sivela emndenini weNdlunkulu kaZulu ngaphansi kweNdlu kaBhusha, esiqala ngokuthi “ Kuyinkinga ukusebenzisa amandla ongenawo”. Bese siqhuba ngokuthi amaphepha asenkantolo akuveza kahle kamhlophe ukuthi kunecala elikhona inombolo yalo engu : 17018/23P yagxivizwa Inkantolo enkulu yaseMgungundlovu ngomhlaka 13 Novemba 2023.
Lelicala liphakathi kuka Prince Mbonisi Bhekithemba kaBhekuzulu, Prince Vulindlela kaBhekuzulu, Prince Mathuba kaBhekuzulu, Prince Gaylord Mxolisi kaBhekuzulu, Princess Lindiwe kaBhekuzulu – nabamangalelwe kulelicala okungo ;President of the Republic of South Africa, Minister of Coopera[ve Government and Traditional Affairs, Minister of Agriculture, Land Reform and Rural Development, Premier of KwaZulu-Natal, Director General: KwaZulu-Natal Office of the Premier, Inkosi Rubert Sifiso Shinga, King MisuZulu kaZwelithini, Ingonyama Trust, Ingonyama Trust Board, Nkosi Thanda Mzimela, Advocate Linda Zama, Thandi Dlamini, Nomusa Zulu, Ntambudzeni Dandy Matamela, Inkosi Phallang Bokang Molefe, Inkosi Sibonelo Mkhize, Lisa Del Grande, Vela Mgwengwe, Siyamdumisa Vilakazi, and AmaKhosi of the Province of KwaZulu-Natal.
Kafushane amalunga omndeni waseNdlunkulu kaZulu azwakalisa ukungenami kwawo mayelana nesinqumo seSilo uMisizulu kaZwelithini njengoba udaba oluphikisa ukubekwa kwakhe uMengameli wezwe uMnu Cyril Ramaphosa, lusesezithebeni zenkantolo, lokhu okwenza ukuthi abomndeni waseNdlunkulu babone Isilo njengomuntu ongenamandla okuthi angenza umsebenzi wokuqoka uNdunankulu kaZulu.
“Kungenxa yalesisizathu ukuthi, thina njengamalunu omndeni waseNdlunkulu kaZulu sikuthatha njengechilo lokhu okwenzeke ngosuku lokukhunjulwa kwempi yaseSandlanwa ukuthi kuqokwe uMfundisi uThulasizwe Buthelezi kanye neNkosi Phathisizwe Buthelezi , ngakho siyakuphikisa siwumndeni waseNdlunkulu kaZulu, futhi kufana nenhlamba emndenini waseNdlunkulu nasesizweni sikaZulu sonkana”. Kuchaza isitatimende.
Siqhuba isitatimende sithi lokuqokwa kukaNdunankulu kaZulu kubukela phansi udaba olusezithebeni zenkantolo njengoba ukubekwa kuka Misizulu njengeSilo kubukela phansi ubukhosi ngoba uThulasizwe Buthelezi akasiyo Inkosi futhi kuphinde kudunge ubudlelwane phakathi kwaMakhosi, kanye nomndeni waseNdlunkulu kaZulu.
“Sifisa ukukubeka kucace ngaphandle kokuhloniza ukusho ukuthi uPrince Mbonisi
kaBhekuZulu, weNdlu kaBhusha, nguye oyikhanda lomndeni waseNdlunkulu kaZulu, ngakho kungumsebenzi wethu ukuthi siveze amaqiniso, njengoba kunabantu abenza konke okusemandleni ukudunga amalunga omndeni weNdlunkulu kaZulu. Okungakho sibona kufanele ukuthi sivezele isizwe sikaZulu kanye neNingizimu Afrika yonkana amaqiniso”. Kuphetha isitatimende.
