Iphinde yaphula izinhliziyo zabalandeli iKaizer Chiefs ihlulwa ukungena ku Top 8 ye Dstv Premiership. IChiefs ibhaxabulwe iqembu elisemsileni elidliwe yizembe iCapetown Spurs ngamagoli amabili eqandeni 2-0 ngamagoli ka Michael Morton no Ashly Cupido emdlalweni weligi obuse DHL Stadium ngoMgqibelo ntambama , lomphumela uchaza ukuthi Amakhosi ngeke alubhade ku MTN TOP 8 ezodlalwa ekuqaleni kwesizini ka 2024 no 2025
Badinwe baganwa unwabu abalandeli be Chiefs ngalomphumela ,bashiye abangalazi ezinkundleni zokuxhumana begadla bephindelela emndenini wakwa Motaung bathi izikhulu zeChiefs kufanele zizinuke amakhwapha basebenzise lesikhathi sokuvalwa kwesizini ukulungisa izinkinga eqenjini kusukela kubaqeqeshi kuya kubadlali bathi akukwazi ukuthi iqembu elikhulu kangaka liqede isizini lincela izithupha.
Khonamanjalo iOrlando Pirates ikwazile ukungena ku Champions League
izophelezela iMamelodi Sundowns emdlalweni yase Africa kanti abafana base Kapa i Stellenbosch bazogijima ku CAF Confederation , izinsizwa zase
Limpopo iPolokwane City zithethe unamba 8 ku log obufunwa yi Chiefs. IPolokwane izobhekana naMasandawana emqhudelwaneni we MTN Top 8.
UTshegofatso Mabasa umgadli wezaka Magebhula ukhale wemuka ne Golden boot wehlule oPeter Shalulile , Samir Nukorvic, Khanyisa Mayo , Ribiero Costa , Iqraam Rayners, Bradley Grobler , Chibuike Ohizu no Gabadinho Mhango
