ZAMA MAJOLA BENO NTOMBIFUTHI BUTHELEZI
UMengameli wezwe uMnu. Cyril Ramaphosa unike uNgqongqoshe wamaPhoyisa uMnu. Senzo Mchunu ikhefu eliyisipesheli njengoba kusalindwe ikhomishana ezophenya ngezinsolo zokuthi uyagxambukela emsebenzini woMbutho Wamaphoyisa aseNingizimu Afrika (SAPS).
URamaphosa ngeSonto lomhlaka-13 Julayi 2025 uphinde wamemezela ikhomishana ezoholwa yiPhini leNhloko yamaJaji elibambile, uMbuyiseli Madlanga ukuze iphenye izinsolo zikaKhomishana wamaPhoyisa KwaZulu-Natal, uMnu. Nhlanhla Mkhwanazi, zokuthi uMchunu wagxambukela ophenyweni lwamaphoyisa olubucayi wabe esesebenzisana nosomabhizinisi, okuhlanganisa nabasolwa ngokubulala ukuze kuhlakazwe ithimba elibhekene nokubulawa kwezepolitiki eKZN.
URamaphosa uthe uzoqoka isikhashana kwiKhabhinethi lakhe ozongena ezicathulweni zikaMchunu kuze kube uSolwazi wezomthetho eWits, uFiroz Cachalia, esula ezifundweni bese ethatha izintambo zikaNgqongqoshe ngo-Agasti. UCachalia uke waba nguNgqongqoshe wezokuPhepha nokuvikeleka eGauteng.
UMthethosisekelo unikeza uMengameli amandla okuqoka abantu ababili kuKhabhinethi yakhe abavela ngaphandle kweSishayamthetho Sikazwelonke. Ithimba eliqokiwe kuzodingeka ukuthi lihlinzeke ngemiphumela yesikhashana ngemva kwezinyanga ezintathu nangemumva kwezinyanga eziyisithupha, ngaphambi kokuba umbiko wokugcina uthulwe ephalamende “Ithimba kuzomele lenze izincomo ngesimo sokuqashwa kwalezo zikhulu, okuhlanganisa nokuthi kufanele zimiswe yini.” kusho uMengameli wezwe. UMchunu uzichithile izinsolo uthe uyasamukela isinqumo futhi uyalweseka ngokugcwele loluphenyo.“Ngiyasamukela futhi ngiyasihlonisa isinqumo esithathwe uMengameli, ngiyazibophezela kulolu hlelo.” kusho uMchunu.Ukumiswa kuka Mchunu kanye nesinyathelo sikaMengameli sihlangabezane nengwadla yokugxekwa amaqembu aphikisayo okubalwa uMkhonto Wesizwe Party (MKP) nele Economic Freedom Fighters (EFF) kanye nawo amaqembu angaphakathi kuhulumeni wobambiswano (GNU) afana ne Democratic Alliance (DA) ngokwehluleka ukuthathela izinyathelo izikhulu ezisolwa ngokwenza okuphambene nengalo yomthetho.Amaqembu aphikisayo akubeke kwacaca ukuthi uMengameli wenze kabi ngokuthi anikeze uMchunu ikhefu eliyisipesheli athi bekumele amuxoshe ngoba wenze inkohlakalo waphinde waphazamisa ukusebenza kwengalo yomthetho.
