Isithombe: Umfundi oyisithulu, uNksz Londeka Phakathi, ethola iziqu zakhe zeBachelor of Social Work. –Umthwebuli wezithombe: Sethu Dlamini
SHEILA MHLONGO
Kumfundi oyisithulu, uNksz Londeka Phakathi, ukuthola iziqu zeBachelor of Social Work kuwukuqala kohambo lomsebenzi olwakhelwe ekuzinikeleni ukuthuthukisa ukufinyeleleka nokubandakanywa kwabantu abasebenzisa uLimi Lwezandla LwaseNingizimu Afrika (SASL) kanye neminye imiphakathi ebhekene nokucwaswa.
UPhakathi ukhethe ukufundela iziqu zeSocial Work e-UKZN ngemuva kokubona ukuthi izithiyo zokuxhumana zibathinta kanjani abantu abaningi abayizithulu abafuna usizo. “Ngikhule ngisebenzisa uLimi Lwezandla LwaseNingizimu Afrika, ngabona izithiyo ezikhona ekutholeni izinsiza. Lokho kwangikhuthaza ukuthi ngibe yingxenye yoshintsho.”
Ukufunda ohlelweni olunzima lobungcweti kudinge ukuzimisela kanye nezinhlelo eziqinile zokwesekwa. Uthi otolika be-SASL, abafundisi kanye ne-Disability Support Unit yase-UKZN bamsize kakhulu ukuze akwazi ukuphumelela ezifundweni zakhe.
“Ontanga bami nabo badlale indima enkulu ngokuba nesineke, ukungibandakanya kanye nokuzimisela ukufunda. Ngaphezu kwalokho, umndeni wami kanye nomphakathi banginike ukwesekwa ngokomzwelo kanye nesikhuthazo, okwangisiza ukuthi ngihlale ngigxile futhi ngiqine phakathi nezifundo zami.”
Enye yezingxenye ebezinzima kakhulu ezifundweni kwakuyimodyuli yocwaningo, eyayidinga ukuthi athole izindlela ezintsha zokufunda ukuze aqonde kahle izifundo eziyinkimbinkimbi.
“Kwadingeka ukuthi ngizivumelanise nezimo ngokuthola izindlela ezintsha zokuqonda okuqukethwe, njengokusebenzisa ukufunda okubukwayo, ukubuza imibuzo eminingi kanye nokusebenza eduze notolika,” kuchaza yena.
Umfundisi wakhe emkhakheni weSocial Work, uDkt Bongane Mzinyane, uthe ukuzimisela kwakhe kwagqama kakhulu ngaleso sikhathi.
“Ngimkhumbula ngokuzibandakanya kwakhe, ngosizo lotolika wakhe we-SASL, kanye nokuzimisela kwakhe ukufunda nokuphumelela ohlelweni lweSocial Work,” kusho uMzinyane.
UPhakathi uthe lolu hambo lwamqinisa ukuzimela kanye nokuzethemba njengomfundi. Ebheka emuva ngesikhathi sakhe e-UKZN, uthe lolu lwazi lwamqinisa kokubili ukuzethemba kwakhe kanye nobuwena bakhe emsebenzini wobungcweti.
Njengoba eselungiselela ukungena emkhakheni womsebenzi, unethemba lokusebenza eduze nomphakathi wezithulu ngesikhathi esifanayo esekela izinhlelo zokuthuthukisa umphakathi jikelele.
“Ngithanda kakhulu ukusebenza nomphakathi wezithulu, ukulwela ukufinyeleleka okulinganayo kwezinsiza kanye nokuqwashisa ngezithiyo zokuxhumana,” kusho yena. “Ngiphinde ngibe nentshisekelo ekuthuthukiseni umphakathi nasekusebenzeni namaqembu abhekene nobunzima ukuze kuthuthukiswe ukuzimela nokubandakanywa.”
Uphinde waba nomlayezo kwabanye abasebenzisi be-SASL abacabanga ukuya enyuvesi: “Zethembe futhi ungavumeli izinselelo zakho zichaze ikusasa lakho. Izwi lakho libalulekile, futhi ukuba khona kwakho emfundweni ephakeme kubalulekile.”
