Amazwibela esithombe:Abafundi base-Elangabini Primary School, eSt Theresa’s R.C. Primary School naseSunford Primary School bebechichima injabulo kulandela ukuklonyeliswa kwabo emncintiswaneni wokonga ugesi ezikoleni, obunemisebenzi engama-55 ebingenisiwe. Abanqobile bamenyezelwe eDurban Botanical Gardens.
SHEILA MHLONGO
Izikole ezintathu zamabanga aphansi zizohlomula ngemikhiqizo nezinhlelo zokonga ugesi ezibiza isamba sika-R100 000, kulandela ukunqoba kwazo emncintiswaneni kaMasipala weTheku Wokonga Ugesi Ezikoleni (Energy Efficiency Schools Competition) wangonyaka wezi-2026/2027.
Abanqobile bamenyezelwe emcimbini wokuklomelisa obubanjelwe eDurban Botanical Gardens ngoMsombuluko, mhla ziyisi-9 kuNovemba 2026.
Lo mncintiswano ubuhlelwe nguMasipala weTheku ngokubambisana noMnyango Kazwelonke Wezogesi Namandla (Department of Electricity and Energy – DEE).
Isikole iSunford Primary School siphume endaweni yokuqala neyesibili esigabeni sokwenza amaphosta, kanti sizohlomula ngemikhiqizo yokonga ugesi ebiza isamba sika-R50 000.
Isikole i-Elangabini Primary School sizohlomula ngezinhlelo zokonga ugesi ezibiza u-R30 000, kanti iSt Theresa’s R.C. Primary School izothola imikhiqizo ebiza u-R20 000 ngenxa yemidlalo yeshashalazi efundisayo nehehayo eyethulwe ngabafundi baso.
Lo mncintiswano ubuvulekele abafundi abafunda amabanga esi-5 kuya kwelesi-7, ngaphansi kwendikimba ethi: “Masonga Ugesi Namuhla Ukuze Sakhe Ikusasa Elisimeme.”
Abafundi bebekhuthazwa ukuba bethule izindlela ezingokoqobo zokonga ugesi besebenzisa amaphosta nemidlalo yeshashalazi. Sekukonke, kwamukelwe imisebenzi engama-55 ebingeniswe kulo mncintiswano.
Ithimba lamajaji lincome abafundi ngobuhlakani nangemibono emisha abayethulile, egcizelela ukubaluleka kokusebenzisa ugesi ngendlela efanele, ukunciphisa ukusetshenziswa kukagesi kanye nokwakha ikusasa elisimeme.
Lo mncintiswano uyingxenye yoHlelo lukaMasipala weTheku Lokonga Ugesi Nokunciphisa Ukuguquguquka Kwesimo Sezulu (Energy Efficiency and Climate Change Mitigation Programme).
Lolu hlelo luhlose ukuqwashisa intsha ngokubaluleka kokuvikelwa kwemvelo kanye nokukhuthaza ushintsho oluzohlala isikhathi eside endleleni abantu abasebenzisa ngayo amandla kagesi.
Izikole ezinqobile zizosebenzisa imiklomelo yazo ukwenza imisebenzi ezosiza ukunciphisa ukusetshenziswa kukagesi nokugqugquzela izindlela zokuphila ezisimeme.
Ekhuluma egameni loMnyango Wezogesi Namandla, uMnu Ntsikelelo Mkhithika uthe ukuhlomisa intsha ngolwazi namakhono kubaluleke kakhulu ohlelweni lwaseNingizimu Afrika lokuguqukela ezindleleni ezintsha zokukhiqiza nokusebenzisa amandla.
“Sidinga abafundi bethu ukuba babe nobuhlakani futhi baqhamuke nemibono emisha, ikakhulukazi emkhakheni wezinguquko kwezokusetshenziswa kwamandla eNingizimu Afrika. Kumele babe ngamanxusa ekusasa labo, basebenzise ugesi ngendlela efanele ezikoleni, emakhaya nasemiphakathini yabo,” kusho uMkhithika.
UThishanhloko wesikole iSt Theresa’s R.C. Primary School, uMnu Simpson, uzwakalise ukubonga ngokuhlonishwa kwesikole sakhe.
“Isikole sethu sesineminyaka eyi-101 sasungulwa, ngakho noma yiluphi usizo lokonga ugesi luzosisiza ukuba siqhubeke nokwakhela abafundi bethu ikusasa elisimeme.
“Siyabonga kakhulu ngaleli thuba, siphinde sibonge othisha nabafundi bethu abasebenze ngokuzikhandla ngesikhathi samaholidi ezikole ukuze bakwazi ukubamba iqhaza kulo mncintiswano,” kusho uSimpson.
UMasipala weTheku uhalalisele zonke izikole nabafundi ababambe iqhaza kulo mncintiswano, waphinde wabakhuthaza ukuba baqhubeke nokuba ngamanxusa okonga ugesi nokuvikela imvelo emiphakathini yabo.
Umthombo: Uphiko Lwezokumaketha Nezokuxhumana, kuMasipala weTheku (Marketing and Communications Directorate).
