ESITHOMBENI- Abombutho wamaPhoyisa aseNingizimu Afrika- isithombe sithathwe kuSAPS Facebook
SHEILA MHLONGO
Uhulumeni ukhiphe isexwayiso esiqinile sokuthi noma yikuphi ukuhlaselwa kwamalungu oMbutho Wamaphoyisa aseNingizimu Afrika (i-SAPS) noma ezinye izinhlaka zomthetho kuzobhekana namandla aphelele omthetho.
Esitatimendeni esikhishwe ngoLwesihlanu lomhlaka 24 Julayi , i-Government Communication and Information System (i-GCIS) ithe ukuhlaselwa kwezikhulu zomthetho kubukela phansi igunya loMbuso kanye nohlelo lwezwe olusekelwe kuMthethosisekelo.
“Ukuhlaselwa kwezikhulu zomthetho kuwukuhlasela igunya loMbuso kanye nokubusa komthetho,” kusho isitatimende.
Uhulumeni ugcizelele ukuthi ngeke ayibekezelele imizamo yokwesabisa, yokushaya, yokusongela noma yokuphazamisa amalungu e-SAPS nanoma iyiphi enye inhlangano yezomthetho esebenza ngaphakathi kwemingcele yaseNingizimu Afrika.
“Uhulumeni ngeke abekezelele noma yimuphi umzamo womuntu noma weqembu elithile ngaphakathi kwemingcele yaseNingizimu Afrika wokwesabisa, ukushaya, ukusongela noma ukuphazamisa amalungu oMbutho Wamaphoyisa aseNingizimu Afrika nezinye izinhlaka zomthetho. Labo abathintekayo bazolandelwa, baboshwe futhi bashushiswe ngokugcwele ngokomthetho,” kusho isitatimende.
Lesi sitatimende siphinde saqinisekisa ukuzibophezela kukahulumeni ekuvikeleni izikhulu zomthetho nasekuqinisekiseni ukuthi ziyakwazi ukwenza umsebenzi wazo eziwunikwe uMthethosisekelo ngaphandle kokwesaba noma ukuphazanyiswa.
“UMbuso uzothatha izinyathelo eziqinile zokuvikela labo abaphathiswe ukuphoqelela umthetho nokugcina ukuthula emphakathini. INingizimu Afrika iyizwe lentando yeningi elibuswa ngokomthethosisekelo futhi elisekelwe ekubuseni komthetho. Wonke umuntu ongaphakathi kwemingcele yezwe kulindeleke ukuba ahloniphe imithetho nezikhungo zezwe,” kusho uhulumeni.
Uhulumeni wengeze ngokuthi usazimisele ngokuqinile ukuvikela izikhungo zezwe nokugcina ukuthula emphakathini.
“Ngeke kube khona ukuhlehla noma ukuvumelana lapho kuziwa ekuvikeleni igunya loMbuso nasekuqinisekiseni ukuphepha kwalabo abasebenzela futhi bavikele isizwe.” – SAnews.gov.za
Bottom of Form
