Ithimba laseNingizimu Afrika le-Para Table Tennis ngokwenza kahle emqhudelwaneni i-ITTF World Para Future Table Tennis Championships
KZN SPORTS REPOTER
I-South African Table Tennis Board ihalalisela ithimba laseNingizimu Afrika le-Para Table Tennis ngokwenza kahle emqhudelwaneni i-ITTF World Para Future Table Tennis Championships, obuse-Aktobe, eKazakhstan, kusukela mhla zingama-25 kuya zingama-28 kuNtulikazi 2026.
Liqhudelana nabanye babadlali be-Para table tennis abasezingeni eliphezulu emhlabeni, ithimba laseNingizimu Afrika likhombise ukuzimisela okukhulu, laphakamisa nefulegi lezwe ngokuziqhenya esiteji somhlaba.
Ithimba laseNingizimu Afrika belihlanganisa:
- Sthabile Francisca Mnyandu – TT10
- Aphile Nosipho Mhlongo – TT8
- Nasr Esau – TT10
- Asanda Nhlanhla Junior Khawula – TT7
- Ntombomhlontlo Somtswayi – TT3
- Sibulele Majola – TT5
- Tankiso Hata – TT5
- Vusimuzi Mabaso – TT4
- Samkele Notshe – TT10
- Simon Modisaempang Dithejane
- Dawne Lamour Fortuin
Oenze ezibukwayo eNingizimu Afrika kube nguSthabile Francisca Mnyandu, othole indondo yethusi emqhudelwaneni wabesifazane i-Women’s Singles Class 10, ngemuva kokwenza kahle kakhulu kulo mqhudelwano.
UMnyandu wafinyelela kowandulela owamanqamu (semi-finals), lapho ehlulwe khona kancane nguSafira Faizutdinova waseRussia, nokumenze wazitholela indawo efanele esiteji sabawine izindondo.
UMnyandu uphinde wenza kahle kwi-Mixed Doubles Class XD20, lapho ebambisene khona noSamkele Notshe. Laba baseNingizimu Afrika bafinyelele kowandulela owamanqamu, ngaphambi kokuhlulwa nguTalgat Erekeyev no-Altynay Yerzhankyzy baseKazakhstan, ngaleyo ndlela baphuthelwa kancane yithuba lokudlala kowamanqamu wokulwela indondo yegolide.
Lo mqhudelwano unikeze abasubathi baseNingizimu Afrika be-Para ithuba elibalulekile lokuncintisana ezingeni lomhlaba, waphinde wakhombisa ukukhula kweNingizimu Afrika kwezokuncintisana namazwe omhlaba. Indlela ithimba elenze ngayo ikhombise izinyanga zokuzinikela, ukusebenza kanzima kanye nokuphokophela ukwenza kahle.
I-South African Table Tennis Board ihalalisela lonke ithimba, okubalwa kulo abasubathi, abaqeqeshi nabaphathi, ngokumela izwe ngokuziqhenya nangobuchwepheshe.
Impumelelo kaSthabile Mnyandu noSamkele Notshe kulo mqhudelwano iyigxathu elibalulekile kwi-Para table tennis yaseNingizimu Afrika futhi iwumthombo wogqozi njengoba ithimba liqhubeka nokuzilungiselela impumelelo emiqhudelwaneni yamazwe omhlaba ezayo.
Ihlanganiswe nguPriya Ranchod
Ucingo: 076 681 5838
