UNksz Melissa Sibanda, ongumfundi ophinde abe yisisebenzi saseNyuvesi yaKwaZulu-Natal (UKZN), ozomela iNingizimu Afrika emqhudelwaneni wamanqamu wamazwe ngamazwe wezinkulumo-mpikiswano we-BRICS ozobanjelwa eRussia ngoDisemba 2026
SHEILA MHLONGO
Umfundi owenza iziqu zobudokotela (PhD) eNyuvesi yaKwaZulu-Natal (UKZN), uNksz Melissa Sibanda, usephakamise ifulegi laseNingizimu Afrika ngokunqoba umncintiswano kazwelonke wezinkulumo-mpikiswano we-BRICS, nokumenze wakwazi ukuthola ithuba lokumela izwe emqhudelwaneni wamazwe ngamazwe ozobanjelwa eMoscow, eRussia, ngoDisemba 2026.
Lo mncintiswano kazwelonke, obuhlelwe yi-BRICS Research Institute, ubuhlanganisa ababambiqhaza abadingida izindaba ezithinta amazwe angamalungu e-BRICS, ezomnotho, ezombusazwe kanye nokubusa komhlaba.
USibanda uzobhekana nabanye abanqobe imincintiswano kazwelonke emazweni angabasunguli be-BRICS, okubalwa kuwo iBrazil, iRussia, i-India kanye neChina.
Ozonqoba emqhudelwaneni wamazwe ngamazwe uzothola ithuba lokuyofunda nokucobelelana ngolwazi enyuvesi azikhethele yona kwelinye lamazwe e-BRICS, zonke izindleko zikhokhelwe.
UCWANINGO LWAKHE LUGXILE EZINKINGENI EZITHINTA ABESIFAZANE NEMIPHAKATHI ENTULAYO
USibanda, oneminyaka engu-29, wenza izifundo zePhD emkhakheni weGeography, Planning and Housing ngaphansi kweSchool of Social Sciences e-UKZN.
Ucwaningo lwakhe lugxile ekuhloleni ubunzima obubhekana nabesifazane abahlala emijondolo, ikakhulukazi labo abangakwazi ukuthola amandla kagesi athembekile futhi angabizi kakhulu.
Lolu cwaningo luphinde lubheke indlela ubuphofu, ukungalingani ngokobulili kanye nokungatholakali kwezinsiza zikagesi okuthinta ngayo izimpilo zabesifazane emiphakathini entulayo.
Ngaphandle kokuba ngumfundi, uSibanda uphinde asebenze njenge-Academic Development Officer eCollege of Humanities, lapho esiza khona abafundi ukuba bathuthuke ezifundweni zabo.
Uhambo lwakhe lwezemfundo lwaqala khona e-UKZN, lapho athola khona iziqu zakhe zokuqala kanye neziqu zeMasters.
UHAMBO LWASECHINA LUMVULE AMEHLO NGEZINKINGA ZOMHLABA
USibanda uthe intshisekelo yakhe yokubamba iqhaza emncintiswaneni we-BRICS yaqala ngesikhathi ethola ithuba lokuhambela ingqungquthela yesithathu ye-BRICS Research Institute eyayibanjelwe eChina ngo-2024.
Lolu hambo lwaluxhaswe yiCollege of Humanities Research Office.
“Ngaya kule ngqungquthela njengomcwaningi wezindaba zezindlu, kodwa ngabuya sengiqonda ukuthi izindaba engizikhathalelayo, ezifana nobuphofu, ukungalingani ngokobulili, amandla kagesi kanye nendlela amadolobha akhiwa ngayo emhlabeni, yizona kanye okuxoxiswana ngazo ezinkundleni zamazwe amaningi.
“Lokhu kwangigcizelela ukubaluleka kokuthi amazwe aseNingizimu yoMhlaba (Global South) azibekele imigomo yawo, kunokuba amukele nje imigomo ebekwe ngamanye amazwe,” kusho uSibanda.
Uthe lesi sipiliyoni samenza wafisa ukuba yingxenye yezingxoxo ezithinta ikusasa lomhlaba, kunokuba abe ngumuntu obuka nje okwenzekayo.
Ngenxa yalokho, ngoMashi walo nyaka wafaka isicelo sokungenela umncintiswano wezinkulumo-mpikiswano we-BRICS.
UZILUNGISELE NGOKUJULILE IZINKULUMO-MPIKISWANO
Ekulungiseleleni umncintiswano, uSibanda uchithe isikhathi esiningi efunda ngomlando we-BRICS, indlela esebenza ngayo, izinhlaka zayo kanye nezikhungo ezihambisana nayo.
Uphinde wacwaninga ngezintshisekelo zezombusazwe nezomnotho zamazwe angamalungu, kanye nezinkulumo-mpikiswano ezimayelana nokuguqulwa kwendlela umhlaba obuswa ngayo.
“Yilokho kanye okuyindikimba yalo mncintiswano: ukuthi ngabe i-BRICS iyakwazi yini ukuguqula indlela yokubusa komhlaba, noma igcina iphinda ukungalingani osekuvele kukhona,” kuchaza uSibanda.
Mayelana namalungiselelo akhe omqhudelwano wamanqamu, uthe uzogxila ekuzibambeni nasekucabangeni ngokucacile ngisho noma engaphansi kwengcindezi.
“Yilokho engikufundile emizuliswaneni kazwelonke, futhi ngihlose ukukusebenzisa nasemqhudelwaneni wamazwe ngamazwe,” kusho yena.
USibanda uthe uzimisele ngokulalela ngokucophelela imibono yabanye ababambiqhaza, hhayi ukugxila kuphela ekuphikiseni izinkulumo zabo.
“Ukumela iNingizimu Afrika ngendlela efanele akusho ukuthi kufanele ngikhulume kakhulu kunabanye. Kunalokho, kudinga ukuthi ngiyihloniphe futhi ngiyihlolisise imibono yabo, ngesikhathi esifanayo ngime ngiqine emibonweni yami esekelwe ebufakazini nasecwaningweni,” kusho uSibanda.
I-UKZN IYAZIQHENYA NGEMPUMELELO KASIBANDA
UMqondisi Omkhulu woPhiko Lwezobudlelwano Bezikhungo e-UKZN, uDkt Normah Zondo, uhalalisele uSibanda ngempumelelo yakhe, wathi lokhu kuyisikhathi sokuziqhenya enyuvesi.
“Simhalalisela kakhulu uMelissa ngale mpumelelo encomekayo, ekhombisa hhayi kuphela ikhono lakhe lokucabanga ngokujulile nokuzethemba, kodwa nendlela abheka ngayo izindaba zomhlaba kanye nekhono lokuhlaziya izinkinga ezinzima.
“Impumelelo yakhe ikhombisa ukubaluleka kwemfundo esezingeni eliphezulu, ucwaningo olunzulu kanye nezingxoxo ezisekelwe olwazini nasebufakazini.
“Siyaziqhenya kakhulu ngendlela uMelissa asebenzisa ngayo ulwazi lwakhe lwezemfundo ukubhekana nezinkinga ezithinta imiphakathi, okubalwa kuzo ubuphofu, ukungalingani ngokobulili, ukufinyelela kugesi kanye nokuthuthukiswa kwamadolobha emazweni aseNingizimu yoMhlaba.
“Ngokwenza lokhu, ukhombisa ukuthi ulwazi olutholakala emanyuvesi akufanele lugcine emakilasini kuphela, kodwa kufanele lusetshenziselwe ukwenza umehluko ezimpilweni zabantu nasezingxoxweni ezibumba ikusasa lethu sonke,” kusho uDkt Zondo.
Uqhube wathi impumelelo kaSibanda iwubufakazi bezinga eliphezulu labacwaningi abasebasha abaqhamuka e-UKZN kanye negalelo labo ezingxoxweni zolwazi emhlabeni wonke.
“Simfisela impumelelo enkulu uMelissa njengoba esezomela iNingizimu Afrika ezinkundleni zamazwe ngamazwe. Siyethemba ukuthi uzolikhombisa ikhono lakhe lokucabanga ngokujulile, ukuzethemba kanye nombono wakhe ohlukile, okuyizinto ezibe yisisekelo sohambo lwakhe lwezemfundo,” kuphetha uDkt Zondo.
Umthombo: Corporate Relations Division, University of KwaZulu-Natal (UKZN).
.
