NOMTHANDAZO MAGOSO
UMasipala Wesifunda UMkhanyakude, ngaphansi kobuholi beMeya uSiphile Mdaka, silale isibili kuzwelonke – silandela iGauteng – ngokwemiphumela yeSithifiketi Sikazwelonke Semfundo Ephakeme (National Senior Certificate), kanti yisona esiphume phambili lapha KwaZulu-Natal osekube iminyaka emibili ilandelana. Lokhu kuqinisekisa idumela lesifunda njengendawo enamandla amakhulu ekuphumeleleni kwezemfundo. Le mpumelelo iveza ukuzimisela okuqhubekayo eMkhanyakude ekuphakamiseni izinga, iqhubekisela phambili impumelelo yonyaka odlule lapho isifunda sithathe indawo yesithathu kuzwelonke.
IMeya uMdaka uhalalisele ikilasi lika-2025 ngomsebenzi walo ovelele, eqaphela ukuzikhandla nokuzinikela kwalo. Uphinde wancoma othisha nabazali ngendima ebalulekile abayidlalile ekwesekeni abafundi.
“Ubuhlakani bezemfundo baseMkhanyakude abunamlingani, ngenxa yomsebenzi onombono woMnyango Wezemfundo nabanye ababambiqhaza,” kusho uMeya uMdaka. “Akukho ongaphika umthelela wezinkundla zemisebenzi (career expos) eziqhubekayo kusukela ebangeni leshumi kuya kweleshumi nambili, ama-boot camp nezinhlelo zokuvakashela izikole okuhloswe ngazo ukusiza abafundi abantulayo. Ikilasi lika-2025 libeke izinga elihle kakhulu ngokuthola izinga lokuphasa elingu-93.63%, lenyuka lisuka ku-92.8% wangonyaka odlule. Sisonke, sizokuqhubeka nokuqinisa amandla abafundi ukuze bafinyelele ezingeni eliphezulu kakhulu,” kusho uMeya uMdaka.
Njengoba laba bafundi abavelele bethatha izinyathelo zabo zokuqala endleleni yabo yesikhathi esizayo, uMeya uMdaka ubafisela inhlanhla nempumelelo kuzo zonke izindlela abazikhethile.
Le mpumelelo ilandela ukusebenza ngokuzimisela kwekilasi lika-2024, lapho abafundi abangaphezu kuka-9 000 bathola iziqu ze-bachelor’s degree, okwenza isifunda sathatha indawo yesithathu eNingizimu Afrika.
