Isithombe: ITheku liqhubeke nokuba nokuthula nokuzinza ngesikhathi semibhikisho yangomhla zingama-30 kuNhlangulana, ngaphandle kwezehlakalo ezinkulu zodlame, ukulahleka kwemiphefumulo noma ukulimala okukhulu kwengqalasizinda. Izithombe: Thuli Dlamini.
UMasipala waseThekwini usamukele ngentokozo ukuziphatha okunokuthula nokuhlelekile kwemibhikisho ebibanjwe kabanzi mhla zingama-30 kuNhlangulana, lapho kungabikwanga khona izehlakalo ezinkulu zodlame, ukulahleka kwemiphefumulo, noma ukulimala okukhulu kwengqalasizinda kulo lonke iDolobha.
UMeya weTheku , uKhansela Cyril Xaba, uncome izakhamuzi, abahleli bemibhikisho, kanye nezinhlaka zomthetho ngokuqinisekisa ukuthi imibhikisho iqhutshwe ngendlela enesibopho, echaza lo mphumela njengempumelelo enkulu kwezokuphepha komphakathi, ukuzinza komphakathi, kanye nokubamba iqhaza ngentando yeningi.
Ukuqapha okuqhubekayo okwenziwe ithimba leDolobha elihlanganisa iminyango ehlukahlukene usuku lonke kuqinisekise ukuthi imibhikisho ihambe ngokuthula, okubonise ukuziphatha okufanele kwezakhamuzi kanye nokubambisana okuhle phakathi kwazo zonke izinhlangothi ezithintekayo.
UMeya uXaba uthe ukuziphatha kwezakhamuzi kukhombise ukuthi amalungelo entando yeningi angasetshenziswa ngendlela evikela izimpilo zabantu, impahla, kanye nenhlalakahle yemiphakathi.
“Njengobuholi beDolobha, siyakuthokozela ukuziphatha okuhle kwezakhamuzi ezibambe iqhaza emibhikishweni ebibanjwe ezindaweni ezahlukene zaseThekwini. Siyakhuthazeka ukuthi akubanga khona izehlakalo ezinkulu eziholele ekulahlekeni kwemiphefumulo noma ekulimaleni okukhulu kwengqalasizinda. Lokhu kukhombisa ukuthi imiphakathi ingawasebenzisa amalungelo ayo entando yeningi ngendlela enesibopho ngenkathi igcina ukuphepha nokuzinza kweDolobha lethu,” kusho uSodolobha uXaba.
UMeya uphinde wabonga izinhlaka ezahlukene zomthetho ngobungcweti bazo, ukuqapha kwazo okuqhubekayo, kanye nokusebenza ngokubambisana ekuqinisekiseni ukuthi umthetho nokuhleleka kuyagcinwa usuku lonke.
“Sidlulisa ukubonga kwethu emadodeni nakwabesifazane abagqoke umfaniswano abasebenze ngokuzikhandla ukuqapha isimo, ukulawula izixuku, nokuvikela izakhamuzi. Ukuqapha kwabo, ukuzinikela kwabo, kanye nokulungela ukuphendula ngokushesha kube negalelo elikhulu ekuqinisekiseni ukuthi usuku luhamba ngokuthula kulo lonke elaseThekwini,” kusho yena.
Nakuba imibhikisho ibihambe ngokuthula ezindaweni eziningi, kube nezigameko ezimbalwa ezihlukene ezibikwe eClermont nakwezinye izindawo.
Amaphoyisa nezinye izinhlaka zomthetho aphendule ngokushesha futhi akwazi ukulawula isimo, avimbela ukuthi singabhebhetheki.
UMeya uXaba uphinde waqinisekisa ukuzibophezela kukaMasipala ekuqhubekeni nokugcina umthetho nokuhleleka, ngesikhathi ebonga izakhamuzi ngokukhetha ukuthula nokubamba iqhaza emphakathini ngendlela enesibopho.
“Izehlakalo zalolu suku ziphinde zaqinisekisa ukuthi ukubambisana phakathi kwemiphakathi, izinhlaka zomthetho, nohulumeni kuyisivikelo sethu esiqine kakhulu ekulweni nokungazinzi. Ngokubambisana sikhombisile ukuthi kungenzeka ukuvikela amalungelo entando yeningi ngesikhathi esifanayo sivikela izimpilo zabantu, impahla, kanye nekusasa leDolobha lethu,” kusho yena.
UMasipala uzoqhubeka nokuqapha isimo ngokuseduze, njengoba izinhlaka zomthetho zizoqhubeka nokuthunyelwa ezindaweni ezahlukene zaseThekwini ukuze kugcinwe uzinzo, kuqiniswe ukuphepha komphakathi, futhi kuvikelwe imiphakathi.
UMeya uKhansela Cyril Xaba ubonge izakhamuzi, abahleli bemibhikisho, kanye nezinhlaka zomthetho ngokuziphatha kwazo ngendlela enesibopho nokuzinikela kwazo ekugcineni ukuthula, ukuphepha, kanye nokubamba iqhaza ngentando yeningi kulo lonke iDolobha.
UMasipala usamile ekuzibophezeleni ukuvikela imiphakathi kanye nokuqinisekisa ukuthi umthetho nokuhleleka kuyagcinwa kulo lonke elaseThekwini.
