IMenenja yeDolobha, uMusa Mbhele, ihole umhlangano wamasu ngoLwesithathu, mhla zingama-30 kuSepthemba 2026, obuhanjelwe ubuholi obuphezulu be-Durban Marine Theme Park (DMTP), ephethe i-uShaka Marine World, kanye nobuholi be-Durban ICC.
SHEILA MHLONGO
UMasipala weTheku uthatha izinyathelo zokuqinisa ukusebenza kwezomnotho kwe-uShaka Marine World kanye ne-Inkosi Albert Luthuli International Convention Centre (Durban ICC).
Zombili lezi zikhungo zineqhaza elibalulekile kwezokuvakasha, ekutshalweni kwezimali nasekudalweni kwamathuba emisebenzi eThekwini.
IMenenja yeDolobha, uMusa Mbhele, ihole umhlangano wamasu ngoLwesithathu, mhla zingama-30 kuSepthemba 2026, obuhanjelwe ubuholi obuphezulu be-Durban Marine Theme Park (DMTP), ephethe i-uShaka Marine World, kanye nobuholi be-Durban ICC.
Lo mhlangano ububizelwe ukusheshisa ukuxazululwa kwezindaba zokusebenza ezingakaphothulwa kanye nokuqinisekisa ukuthi zombili lezi zinhlangano zikaMasipala zihambisana nezinhlelo zeDolobha zokuthuthukisa umnotho nokuvuselela inkaba yedolobha.
I-uShaka Marine World kanye ne-Durban ICC zisendaweni ebalulekile ogwini lwaseThekwini futhi zixhumene ngqo nenkaba yedolobha.
I-uShaka Marine World ingenye yezindawo ezibalulekile ekuthuthukisweni kwe-Point Waterfront. Iheha izivakashi zakuleli nezakwamanye amazwe, eziphinde zeseke amahhotela, izindawo zokudlela kanye namabhizinisi ezitolo endawo.
I-Durban ICC yona iyaqhubeka nokubeka iTheku njengendawo ehamba phambili emkhakheni wemihlangano, izinhlelo zokugqugquzela, izingqungquthela nemibukiso (Meetings, Incentives, Conferences and Exhibitions – MICE). Lo mkhakha uneqhaza elikhulu emalini esetshenziswa yizivakashi kanye nasemnothweni wendawo.
KUHLONGOZWA I-WORLD TRADE CENTRE DURBAN
Okunye obekuseqhulwini ohlelweni lomhlangano kube yi-World Trade Centre Durban (WTCD) ehlongozwayo.
Lolu hlelo kuhloswe ngalo ukusungula indawo yamahhovisi ezinikele ekuheheni ezohwebo lwamazwe ngamazwe, amabhizinisi kanye nokutshalwa kwezimali eThekwini.
Umhlangano ubuye wadingida isiphakamiso sokuthengwa kwesakhiwo i-Smart Xchange ukuze kube yikhaya le-WTCD, kanye nesiphakamiso sokuvalwa kuka-Walnut Road ngenhloso yokwakha indawo edidiyelwe.
Zombili lezi ziphakamiso zisadinga ukulandela izinqubo ezifanele zokugunyazwa nguMasipala kanye nezokubonisana nomphakathi.
Umhlangano ubuye wadingida:
- izindlela zokuthuthukisa ukusebenza kahle kwalezi zikhungo;
- ukugcwaliswa kwezikhala zemisebenzi yabaqondisi; kanye
- nokutshalwa kwezimali kwingqalasizinda yazo zombili lezi zikhungo.
Lezi zinyathelo kuhloswe ngazo ukuvikela izikhungo zezokuvakasha zeDolobha kanye nokwenza zombili lezi zinhlangano zikwazi ukufeza imisebenzi yazo ngendlela efanele.
Ziyingxenye yokuzibophezela okubanzi kukaMasipala ekuvuseleleni inkaba yeTheku ukuze ibe yindawo ephilayo, encintisanayo futhi ehehayo, kanye nokwakha indawo ekhuthaza ukukhula komnotho nokwandisa amathuba emisebenzi kubahlali.
KUKHISHWE: Uphiko lwezokuMaketha nokuXhumana kuMasipala weTheku
