OWAMI THABETHE
U-Eskom KwaZulu-Natali usucele amakhasimende akhokha ngaphambi kwesikhathi (pre-paid) ukuthi ahlole futhi ahlaziye amamitha awo ngaphambi komnqamulajuqu wangomhlaka-24 kuNovemba 2024, njengoba kudingwa yi-Standard Transfer Specification Association (STSA).
Okhulumela u-Eskom uJoyce Zingoni uthe ngemuva kwalesi sikhathi esinqunyiwe, amamitha ngeke esawamukela amathokheni kagesi ngaphandle uma ethuthukisiwe abe yiKey Revision Number (KRN) 2.
“Ukwehluleka ukuhlela kabusha ikhodi kuze kufike usuku olubekiwe kuzovimbela amakhasimende ekufakeni ikhadi likagesi, kwenze amamitha awo angasebenzi,” kuchaza u Zingoni.
NgokukaZingoni, u-Eskom usufake amakhodi ngaphambili amasistimu awo amamitha futhi udinga amakhasimende ukuthi aqedele isinyathelo sokugcina sohlelo ukuze konke kulunge.
“Le nqubo ye-Do-It-Yourself idinga amakhasimende ukuthi athenge amathokheni esikweletu kubathengisi abagunyaziwe, ngemva kwalokho bazothola amasethi amabili amakhodi amadijithi angu-20 ukuze bangene kumamitha abo ukuze babuyekeze,” eqhuba nokuchaza.Ukuhlola imitha, amakhasimende kumele afake u-1844 6744 0738 4377 2416.
U-Eskom uthe uma le nombolo ingasebenzi, amakhasimende kufanele ashaye izinombolo ezihlukile ngokuya ngokwakhiwa kwemitha yawo:
I-L&G (E460) – i057 faka
I-L&G (PLC2) – i057
I-Conlog – #005#
I-Voltex – 005 ingena
Nyamezela – Cindezela okubomvu bese ubamba kuze kuvele amachashazi bese ubhala u-005.
UZingoni ubalule ukuthi u-Eskom usuvule neCustomer Services Hubs kanye neCustomer Network Centres (CNCs) ukuze usize amakhasimende asahlangabezana nezinkinga.
