Amakhosi abethamele umkhosi obusingethwe iSilo uMisuzulu kaZwelithini esithombeni ubonakala emi noNgqongqoshe woMnyango wezokuBusa ngokuBambisana KwaZulu-Natali kanye neziNdaba zoMdabu uThulasizwe Buthelezi
Isilo uMisuzulu kaZwelithini ihole ngempumelelo futhi yasingatha isiko lokuthela amanzi laMakhosi ayisithupha namuhla eSigodlweni saseMashobeni eNongoma, lapho la Makhosi ebephelezelwa khona futhi esekelwa yimindeni yawo kanye namalungu emiphakathi yawo.
Lo mcimbi ubuhanjelwe ngabantu abangaphezu kuka-3 000, okubalwa kubo uNgqongqoshe woMnyango wezokuBusa ngokuBambisana neziNdaba zoMdabu KwaZulu-Natali (COGTA) kanye noNdunankulu weSizwe samaZulu, uMfundisi uThulasizwe Buthelezi.
Lesi siko esibalulekile siyingxenye ebalulekile yenqubo yesintu eyandulela ukufakwa ngokusemthethweni kweMakhosi ezikhundleni, futhi sifanekisela ukuhlanzwa ngokomoya kanye nokuqinisa ubudlelwano phakathi kwaMakhosi neNdlunkulu.
INkosi uMisuzulu kaZwelithini ithe: “Ukulondolozwa kwamasiko ethu kuyisisekelo sobunikazi beSizwe samaZulu. Sibonga aMakhosi, imindeni yawo kanye nemiphakathi ngokweseka izinhlaka zethu zobuholi bendabuko.”
UNgqongqoshe weKwaZulu-Natali weCOGTA noNdunankulu weSizwe samaZulu, uMfundisi uThulasizwe Buthelezi, uthe:
“Ukusingathwa ngempumelelo kwaleli siko yiNgonyama kukhombisa ukubambisana okuqinile phakathi kobuholi bendabuko nohulumeni. UMnyango usazibophezele ekuqhubekeni nokusebenza ngokubambisana nabaholi bendabuko ukuze kuthuthukiswe intuthuko esimeme ezindaweni zasemakhaya.”
Ekhuluma egameni lamanye aMakhosi abambe iqhaza kulolu hlelo, iNkosi uNZ Buthelezi ithe:
“Ukudlula kulesi siko ngaphansi kobuholi beNgonyama, sisekelwa yimindeni yethu, kuqinisa ukuzibophezela kwethu ekuphathweni kwemiphakathi nasekuyisebenzeleni ngobuqotho.”
A Makhosi ayisithupha abambe iqhaza kulolu hlelo yilawa:
- iNkosi uNZ Buthelezi (Isifunda saseZululand)
- uMntanenkosi uZ. Nyawo (Isifunda saseMkhanyakude)
- iNkosi uKM Mchunu (Isifunda saseKing Cetshwayo)
- iNkosi uSK Ngwane (Isifunda saseMkhanyakude)
- iNkosi uNC Maphumulo (Isifunda saseThekwini)
- iNkosi uMSE Mazibuko (Isifunda saseThukela)
