Injabulo ibichichima eSikhungweni SeDolobha Sokweseka Osomabhizinisi saseMkhumbane ngomhlaka 26 Juni ngesikhathi abafundi abangu-70 bebanga lika-2025/26 bethola iziqu zabo ezigunyazwe yi-SAQA ze-NQF Level 2, ngemuva kokuphothula ngempumelelo Uhlelo Lokuqeqeshwa Lokuthuthukisa Amakhono Okukhiqiza Ifenisha oluthatha izinyanga ezintathu nolwezinyanga eziyi-12.Izithombe: Phumla Khwela
UMasipala weTheku uqhubekile nokuqinisa ukuzibophezela kwawo ekulweni nokuntuleka kwemisebenzi ngokuthuthukisa amakhono, njengoba kuqeqeshwe ngempumelelo abantu abangama-70 ohlelweni lukaMasipala lokuqeqesha ekwenzeni ifenisha.
Umcimbi wokwethweswa iziqu obubanjwe kuleli sonto eSikhungweni Sokweseka Osomabhizinisi saseMkhumbane eCato Manor ubungaza abafundi bohlelo lwango-2025/26 abathole izitifiketi eziqinisekiswe yiSouth African Qualifications Authority (SAQA) zeNational Qualifications Framework (NQF) Level 2.
Kulaba abaphothule izifundo, abangama-30 baqede uhlelo lwezinyanga eziyi-12, kanti abangama-40 baqede uhlelo lwezinyanga ezintathu.
Abafundi bathole ukuqeqeshwa okusebenzayo ekwenzeni ifenisha yasekhaya neyamahhovisi, ekufakeni upholstery, ekwethuleni imiklamo, ekuziphatheni emhlabeni wamabhizinisi, kanye nasekulandeleni izindlela ezihamba phambili embonini.
Lolu hlelo lwenziwa ngokubambisana neFurniture Processing and Manufacturing SETA, iColab Design and Manufacturing, iPG Bison, iSmall Enterprise Development Agency, kanye neMy Space Academy.
USihlalo weKomidi likaMasipala Lezokuthuthukiswa Komnotho Nokuhlela, uKhansela Thembo Ntuli, uthe lo mcimbi wokwethweswa iziqu ukhombisa ukuzibophezela okuqhubekayo kukaMasipala ekunikezeni izakhamuzi amakhono asebenzayo ahambisana nezidingo zemakethe.
“Lo mcimbi wokwethweswa iziqu uyisinyathelo esibalulekile emizamweni yethu yokuhlomisa izakhamuzi ngamakhono angazisiza ukuthi zithole imali. Lokhu kubeka laba abaphothule izifundo ethubeni lokuba ngosomabhizinisi, abaqashi nabasunguli bemibono emisha abanegalelo elikhulu ekukhuliseni umnotho wendawo ngendlela ebandakanya wonke umuntu,” kusho uKhansela Ntuli.
Uphinde wathi uMasipala usuhlola amathuba okusungula isikhungo sokusika nokuqeda amaphethelo ezinkuni (cutting and edging facility) ukuze kuthuthukiswe ukutholakala kwemishini ekhethekile futhi kwandiswe amandla okukhiqiza amabhizinisi amancane, amaphakathi kanye namancane kakhulu.
IKhansela leWadi 29, uBhekisisa Mngadi, lithe lolu hlelo lubuyisela isithunzi emphakathini ngokwakha amathuba omsebenzi nawokusungula amabhizinisi kubantu abake babhekana nokungabandakanywa emnothweni.
Manje selungene onyakeni walo wesishiyagalombili, lolu hlelo seluhlomulise abantu abangaphezu kwama-250 selokhu lwaqala.
Abaningi kulabo abaphothule izifundo bathole imisebenzi noma basungule amabhizinisi adale amathuba omsebenzi kwabanye, kanti cishe abangama-20 kubafundi abasanda kuphothula baqashwe yiColab Design and Manufacturing.
Omunye wezindaba zempumelelo zalolu hlelo nguNozuko Nxongo, umsunguli wenkampani iBNK Interior Design and Built-ins.
“Lolu hlelo lwashintsha impilo yami. Ngaqala njengomfundi, kodwa namuhla sengingumnikazi wefekthri futhi ngiqashe nabanye abantu,” kusho yena.
Omunye ophothule izifundo, u-Ayanda Zuma, ongumsunguli wenkampani i-Elo Interiors, uthe lolu hlelo lwamvulela amathuba aguqule ibhizinisi lakhe.
“Ukuba yingxenye yalolu hlelo kwangivulela amathuba engangingakaze ngiwacabange. Ukukhombisa umsebenzi wami embukisweni weDurban Business Fair ka-2026, ukunqoba umklomelo weBest Stand Award, kanye nokuthola ama-oda aqhubekayo kungifakazele ukuthi amakhono ami ayahlonishwa futhi ayadingeka emakethe,” kusho yena.
UMasipala usaqhubeka nokuzibophezela ekwandiseni izinhlelo zokuthuthukisa amakhono ezikhuthaza usomabhizinisi, ezivuselela ukukhula komnotho wendawo, futhi ezidala amathuba emisebenzi aqhubekayo kubahlali.
Lolu hlelo luhlomisa ababambiqhaza ngamakhono okukhiqiza ifenisha, ukuthunga nokufaka izindwangu zefenisha (upholstery), amakhono ebhizinisi kanye nawosomabhizinisi, okubanika amandla okuthola amathuba omsebenzi noma baqale amabhizinisi abo.
