Isikhulu somnyango wezaseKhaya ngesikhathi kwethulwa uhlelooluthuthukisiwe lokubhukha Ku-inthanethi
SHEILA MHLONGO
UMnyango wezaseKhaya wethule uhlelo oluthuthukisiwe lokubhukha ku-inthanethi olutholakala enkundleni ye-MyHomeAffairsOnline, olufaka izindlela zokuphepha eziqinisiwe ukuvimbela ukusetshenziswa kabi kwezikhala zokubhukha nokwenza kube lula ukuthola izinsiza.
Abasebenzisi manje sebedingeka ukuthi bakhe iphrofayela ye-MyHomeAffairsOnline exhunywe nenombolo yabo kamazisi waseNingizimu Afrika (ID) kanye nekheli labo le-imeyili ngaphambi kokwenza ukubhukha. Lokhu kuzosiza ukuqinisekisa ukuthi ama-aphoyintimenti atholakala kuphela kumakhasimende asemthethweni.
Lokhu kuthuthukiswa kulandela iminyaka yokusetshenziswa kabi kohlelo lwangaphambilini lokubhukha ngamaqembu obugebengu kanye nabanye abantu abangathembekile ababexhaphaza ubuthakathaka obukhona ohlelweni ukuze bavimbe izikhala zama-aphoyintimenti bese bezidayisela izakhamuzi ebezidinga usizo ngokuphuthumayo.
Ngenxa yalokho, abantu abaningi baseNingizimu Afrika babebhekana nobunzima bokuthola ama-aphoyintimenti ezinsizeni ezibalulekile zoMnyango WezaseKhaya.
Uhlelo olusha lokubhukha luyatholakala ku-myhomeaffairsonline.dha.gov.za futhi luyingqophamlando entsha ohambweni loMnyango WezaseKhaya lokuguqukela ezinhlelweni zedijithali ngenhloso yokwenza ngcono ukuhlinzekwa kwezinsiza, ukulwa nobugebengu bokukhwabanisa, kanye nokuletha isithunzi kubo bonke abantu.
“Sekuyisikhathi eside abantu baseNingizimu Afrika bebhekene nokungalingani ngenxa yezigebengu ezazisebenzisa ubuthakathaka bohlelo lwangaphambilini lokubhukha ukuze zigodle izikhala zama-aphoyintimenti bese zizithengisa ngenhloso yokwenza inzuzo.
“Ukudluliselwa kohlelo lwethu lokubhukha ku-MyHomeAffairsOnline kubhekana ngqo nalokhu kusetshenziswa kabi ngokuxhumanisa ukubhukha namaphrofayela abasebenzisi aqinisekisiwe. Lokhu kuqinisa ubuqotho bohlelo futhi kuvikela ilungelo lezakhamuzi lokuthola izinsiza.
“Lolu shintsho luqhubekisela phambili umbono wethu we-Home Affairs @ home ngokwenza izinsiza ziphephe kakhulu futhi kube lula ukuthi izakhamuzi zizithole,” kusho uNgqongqoshe WezaseKhaya, Dr Leon Schreiber, esitatimendeni esikhishwe ngoLwesine.– SAnews.gov.za
Top of Form
Bottom of Form
