Amazwibela esithombe: Abafundi abangaphezu kuka-200 bahlole amagugu, amasiko nezindawo ezikhanga izivakashi e-Inanda, eNtuzuma naKwaMashu njengengxenye yohambo lwe-INK-Kasi Xperience lweNyanga Yokuqwashisa Ngezokuvakasha.Lolu hlelo lukhuthaza intsha ukuba ilazi idolobha layo, igubhe izindaba namagugu endawo futhi ibheke amathuba akhona emkhakheni wezokuvakasha.
SHEILA MHLONGO
Abafundi abangaphezu kuka-200 abavela ezikhungweni zemfundo ezahlukene, okubalwa kuzo i-Elangeni TVET College neNyuvesi yaKwaZulu-Natal, babambe iqhaza ohambweni lwe-INK-Kasi Xperience Tourism Awareness Month Tour mhla zingama-22 kuSepthemba 2026.
Lolu hlelo beluhlose ukwazisa intsha ngomlando, amasiko namathuba ezokuvakasha emiphakathini yase-Inanda, eNtuzuma naKwaMashu, eyaziwa nge-INK. Luphinde lwakhuthaza abafundi ukuba bavakashele izindawo ezithakazelisayo edolobheni labo futhi bafunde ngezindaba ezihambisana nazo.
Lolu hambo beluhlelwe yiKASLAM Events ngokubambisana noPhiko lweDurban Tourism. Lugcizelele indima amagugu, amasiko nezokuvakasha eziqhutshwa yimiphakathi ezingayidlala ekukhuliseni umnotho wendawo.
Ababambe iqhaza basuke KwaMashu badlulela e-Inanda, bevakashela izindawo ezibalulekile okubalwa kuzo iGandhi Settlement, eKuPhakameni, i-Inanda Seminary, izindawo zamagugu ezihlobene noDkt Pixley ka-Isaka Seme noBertha Mkhize, i-Inanda Old Post Office kanye ne-Ohlange Institute.
Lolu hlelo lunike abafundi ithuba lokufunda ngomlando, abantu nezindaba ezakhe imiphakathi ye-INK futhi zaba yingxenye yamagugu aseNingizimu Afrika.
Ekhulumela uMasipala weTheku, uKhansela Nxumalo ugcizelele ukubaluleka kokukhuthaza izakhamuzi, ikakhulukazi intsha, ukuba zibone amathuba ezokuvakasha akhona emiphakathini yazo.
“Namuhla kungaphezu kohlelo lwezokuvakasha. Kuyithuba lokwazisa lokho esinakho, ukuxoxa izindaba zethu nokuvulela umhlaba imiphakathi yethu. Sivakashele izindawo ezibaluleke kakhulu emlandweni, emasikweni nasemiphakathini yethu. Lezi zindawo zigcine izinkumbulo, impumelelo, izingqinamba, ukholo nobuholi bezizukulwane ezakhe idolobha nezwe lethu,” kusho uNxumalo.
Uthe lolu hlelo lukhombisa ukuthi ezokuvakasha ziqala ekhaya, wakhuthaza izakhamuzi ukuba zivakashele izindawo ezisedolobheni lazo.
“Imiphakathi yethu, izindawo zamagugu, amabhizinisi endawo, ukudla, umculo, ubuciko nezindaba zabantu konke kuyingxenye yezinto ezicebile ezitholakala eThekwini. Uma sivakashela izindawo zendawo, seseka amabhizinisi endawo, sisebenzisa abaqondisi bezivakashi bendawo futhi sincoma lezi zindawo kwabanye, sisiza ukukhulisa umnotho wezokuvakasha,” kusho yena.
UNxumalo uphinde waveza ukuthi ezokuvakasha zingadala amathuba emisebenzi, amabhizinisi nokuthuthukiswa kwamakhono. Ukhuthaze intsha ukuba icabange ngemisebenzi namabhizinisi emkhakheni wezokuvakasha nowokungenisa izihambi.
Abafundi bakhuthazwe ukuba basebenzise ubuchwepheshe ukuxoxa izindaba zendawo nokwenza okuqukethwe okufakwa ezinkundleni zedijithali. Baphinde bakhuthazwa ukuba bafunde ngamagugu abo futhi babheke amathuba okuqondisa izivakashi, okungenisa izihambi, okuhlela imicimbi, okuthatha izithombe, okwenza amafilimu, ezokuvakasha ezigxile emasikweni nawokuzakhela amabhizinisi.
“Akudingeki uhambe ibanga elide ukuze uthole indaba ekufanele ixoxwe. Izindaba zisizungezile,” kusho uNxumalo.
KwaKASLAM Events, lolu hlelo beluhlose nokuguqula indlela abantu ababuka ngayo imiphakathi ye-INK, ngokukhombisa izindaba ezinhle, abantu nezindawo ezitholakala KwaMashu, e-Inanda nasezindaweni eziseduze.
Umhleli womcimbi, u-Anelisa Ngwenya, uthe uhlelo lwalolo suku luyisinyathelo sokuqala esibalulekile sokwenza lo mkhankaso weNyanga Yokuqwashisa Ngezokuvakasha ube umcimbi waminyaka yonke.
Lolu hambo luyingxenye yohlelo olubanzi lwe-INK-Kasi Xperience, oluzophetha ngomcimbi omkhulu mhla ziyi-19 kuDisemba 2026 ePrincess Magogo Stadium. Uhlelo lwangoDisemba luzoqhubeka nokubandakanya intsha nemiphakathi ngezokuvakasha, ezokungcebeleka nemisebenzi egxile emphakathini.
Abahleli bathe bafuna ukulungisa imibono engelona iqiniso ngemiphakathi ye-INK ngokunika abahlali ithuba lokuxoxa izindaba zabo nokukhombisa okuhle ngezindawo abahlala kuzo.
“Kungumsebenzi wethu, njengabantu abazalelwe lapha, bakhulela lapha nabahlala lapha, ukulungisa imibono engelona iqiniso nokukhombisa ukuthi iKwaMashu, i-Inanda, iNtuzuma nemiphakathi eseduze injani ngempela. Lawa ngamakhaya ethu. Sifuna ukuxoxa izindaba zethu futhi senze ezokuvakasha zisize imiphakathi yethu,” kusho uNgwenya.
Lolu hambo lukhombise ukubaluleka kokusebenzisana kukahulumeni, izikhungo zemfundo, imiphakathi, amabhizinisi ezokuvakasha, izikhungo zamagugu, abahleli bemicimbi nabanye ababambiqhaza. IKASLAM Events ibonge iDurban Tourism, abaholi bomphakathi, izikhungo zemfundo nabanye ababambisene nayo ngokuphumelela kohlelo.
IDurban Tourism ithe lolu hlelo luqinisa umyalezo wokuthi ezokuvakasha azigcini ngokuheha abantu abavela ngaphandle kweTheku. Zihlanganisa nokukhuthaza izakhamuzi ukuba zihlole imiphakathi yazo, zeseke amabhizinisi endawo futhi zikhangise ngamagugu nezindawo ezithandekayo zedolobha lazo.
Ikhishwe uPhiko Lwezokumaketha Nezokuxhumana lukaMasipala weTheku.
