Amadoda abehambele umkhankaso wokuhlolwa umdlavuza wendlala yesinye eMlazi. Kanye nomsunguli wenhlangano iTEMPUDU okungu Dumisani Pakisi.
SHEILA MHLONGO
EMLAZI, eThekwini – Amadoda angu-174 ahlolwe emkhankasweni wokuqwashisa ngomdlavuza wendlala yesinye obuse-Umlazi Comtech High School ngoMgqibelo, 26 Septhemba 2026.
Lo mkhankaso ubuhlelwe yi-TEMPUDU NPC ngaphansi kohlelo lwayo oluthi KUZOLUNGA – It Will Be Well, njengengxenye yeNyanga Yokuqwashisa Ngomdlavuza Wendlala Yesinye.
Esitatimendeni sayo, i-TEMPUDU ithe inhloso yalo mcimbi bekuwukwazisa amadoda ngezinto ezingawandisa amathuba okuba nalesi sifo, izimpawu zaso, nokubaluleka kokuyohlolwa. Inhlangano ikhuthaze amadoda ukuba athathe izinyathelo kusenesikhathi ukuze, uma kutholakala inkinga, athole usizo lwezempilo ngokushesha.
UDkt Mbalo waseSouth Coast Oncology ukhulume ngezinto ezingawandisa amathuba okuba nomdlavuza wendlala yesinye, izimpawu zawo nezindlela zokwelashwa. Uphendule nemibuzo yabebekhona, wabuye wabonisana namanye amadoda ngasese.
Isitatimende se-TEMPUDU sicaphune umsunguli wayo, uDumisani Pakisi, ekhuthaza umphakathi ukuba usuke ekuphikeni nasekwesabeni uye ekufuneni ulwazi nasekuthatheni izinyathelo. Inhlangano ithe ukuza kwamadoda angu-174 ukuzohlolwa kube yisinyathelo esibalulekile emindenini yawo nasemphakathini waseMlazi.
I-TEMPUDU ibonge umphakathi ngokweseka umkhankaso, kanye nababambisene nayo: i-Umlazi AA Clinic, UP Labs, The Brotherhood Social Club, uDkt Kesi Pillay, uDkt Bright Mhlongo, uDkt Mbalo, i-CANSA, i-Factor Of Ten Foundation, i-Umlazi Comtech High School ne-MLCCP.
Umthombo: Isitatimende sabezindaba se-TEMPUDU NPC.
