SHEILA MHLONGO
UNgqongqoshe wezokuThutha nezokuHlaliswa Kwabantu KwaZulu-Natal, uMnu. Siboniso Duma, usamukele isivumelwano sokuxolelana asichaze njengesisemqoka phakathi koMkhandlu we-KZN E-Hailing kanye ne-Phoenix Taxi Association kulandela isigameko sokushaywa komshayeli wakwaBolt ePhoenix.
Lesi sivumelwano sikhokhelwe i-Public Regulatory Entity (PRE) yoMnyango wezokuThutha ngemuva kokuba ukungezwani kukhule kule ndawo.
Kuthiwa umshayeli wakwaBolt washaywa waphinde wabanjwa ngenkani kufunwa inhlawulo ka-R5 000 ngemva kokwehlisa umgibeli ePhoenix Plaza ngoMgqibelo, 14 Febhuwari. Lesi sigameko sidale ukukhathazeka ngokuphepha kanye nokungezwani okuqhubekayo phakathi komkhakha we-e-hailing nowamatekisi.
Ekhuluma emhlanganweni obubanjelwe eBethsaida Church ePhoenix, enyakatho yeTheku, uDuma uncome uPhiko Lwamaphoyisa aseNingizimu Afrika (SAPS), ikakhulukazi iSiteshi Samaphoyisa sasePhoenix esiholwa uKhomishana Wesifundazwe uLieutenant General Nhlanhla Mkhwanazi, ngokungenelela ngokushesha ukuvimbela isimo esasingaba yinhlekelele.
Umhlangano, obuholwa yi-PRE kanye namaphoyisa aseThekwini Metro Police, uchazwe njengobubukhali, abathintekayo beveza izinselelo ezibhekene nomkhakha wezokuthutha umphakathi ePhoenix.
Izingxoxo zigxile ekungezwani okudala phakathi kwemboni yamatekisi nabasebenza nge-e-hailing, ukulandela imithetho kanye nezindaba zokuphepha.
Naphezu kwezinselelo, bobabili uMkhandlu we-KZN E-Hailing kanye ne-Phoenix Taxi Association bazibophezele ekusebenzisaneni ukuze kubuyiswe uzinzo.
Ukulandela imithetho
UDuma uthe izinkampani ze-e-hailing sezibhalisa izinhlelo zazo zedijithali kuMlawuli Kazwelonke Wezokuthutha Umphakathi ngokuhambisana noMthetho Oguquliwe Wezokuthutha Komhlaba Kazwelonke.
Uthe uMnyango Kazwelonke Wezokuthutha ubuyekeza izicelo zezinkampani eziphakathi kweziyisithupha kuya kweziyishumi, kanti umnqamulajuqu ngu-10 Mashi 2026.
“Izinkampani ze-e-hailing eziphumelelayo zizoklonyeliswa ngezitifiketi, bese i-Provincial Regulatory Entity yaziswa. Lokhu kuzovulela indlela abashayeli nabaqhubi esifundazweni ukuthi bafake izicelo zamalayisensi okusebenza,” kusho uDuma.
Wengeze ngokuthi i-PRE izoqinisekisa ukulandela imithetho ngokuqinile ngaphambi kokukhipha amalayisensi okusebenza kubashayeli.
NgoNovemba wonyaka odlule, uMnyango Kazwelonke Wezokuthutha wanxusa abaqhubi be-e-hailing ukuthi baguqule izimvume zabo ze-charter kanye namalayisensi ama-meter taxi babe namalayisensi aqondene ne-e-hailing.
Izinqumo ezisemqoka
Ababambe iqhaza bavumelene ngezinyathelo ezilandelayo zokwakha ukuthula nokuqinisa ukulawulwa ePhoenix:
• Ukusebenzisana ukuthola izixazululo ezihlala isikhathi eside ukuze kuzuze ukuthula nokuzinza emkhakheni wezokuthutha umphakathi ePhoenix.
• Ukuqhubeka kwemihlangano ejwayelekile phakathi kwe-Phoenix Taxi Association noMkhandlu we-KZN E-Hailing, nomhlangano olandelayo ohlelelwe isonto lesibili likaMashi.
• Ukumiswa kwendawo ekhethekile lapho abashayeli be-e-hailing bezokwehlisa futhi balande abagibeli ePhoenix Plaza.
• Ukuqiniswa kokuphoqelelwa kwemithetho yezimoto emgwaqweni ukuze kuthuthukiswe ukuphepha nokulandela uhlelo.
• Ukuqaliswa kwezivimbamgwaqo ezihlanganisa izinhlaka eziningi, okubandakanya uMkhandlu we-KZN E-Hailing, i-Phoenix Taxi Association, SAPS, Road Traffic Inspectorate kanye neMetro Police, ukuze kubanjwe abasebenza ngokungemthetho; kanye
• Ukuhlelwa kweNgqungquthela ye-E-Hailing ngokubambisana neMeya yeTheku uCyril Xaba, ngenhloso yokuhlanganisa ubudlelwano nokuqinisekisa ukubambisana phakathi kwabashayeli be-e-hailing nabaqhubi bamatekisi. Usuku nendawo kuzomenyezelwa maduze.
UDuma uphinde wancoma iSouth African National Taxi Council (SANTACO) yesifunda saseThekwini ngeqhaza layo ekuxhumaniseni izingxoxo nasekuletheni impumelelo yomhlangano. – SAnews.gov.za
