Amazwibela esithombe: IMeya yeTheku, uKhansela Cyril Xaba, ibungaza nabawine imiklomelo yeDurban Business Fair Excellence Awards ka-2026, ebibanjwe mhla ziyi-19 kuSepthemba eDurban Exhibition Centre. Kulo mcimbi kuhlonishwe osomabhizinisi abenze kahle, amabhizinisi angama-24 athola imiklomelo ezowasiza aqinise ukusebenza kwawo, afinyelele emathubeni futhi abe negalelo ekukhuleni komnotho.
SHEILA MHLONGO
UMasipala weTheku uhloniphe osomabhizinisi nabasunguli bezemfashini amabhizinisi abo anegalelo emnothweni wedolobha nasekudalweni kwamathuba emisebenzi, emcimbini weDurban Business Fair (DBF) Excellence Awards obungoMgqibelo, 19 Septhemba 2026, eDurban Exhibition Centre.
Lo mcimbi uhlanganise imiklomelo yeDurban Business Fair, umncintiswano wezinhlelo zamabhizinisi iLions’ Den kanye nemiklomelo yokuhlonipha abasemkhakheni wezemfashini yeDurban Fashion Fair. Abawine bathole ukuqashelwa nokwesekwa ekuthuthukiseni amabhizinisi abo, okuhlanganisa imali yokuthenga imishini nokuhlangabezana nezinye izidingo zamabhizinisi. Imiklomelo ezigabeni ezahlukene ibisukela ku-R10 000 kuya ku-R60 000.
Umncintiswano weLions’ Den uthole izicelo eziyi-121, kwabe sekukhethwa abawine ezigabeni ezintathu ezihambisana namazinga okukhula kwamabhizinisi. Esigabeni samabhizinisi asafufusa, iSparkle n’ Glow iwine, kwalandela iCreative Tech. Esigabeni samabhizinisi asezinzile, kuwine iSuper Clean Tekkie Wash, kwalandela iThandimpumelelo Hardware. I-Msuthukazi Group ithole i-Entrepreneurship Excellence Award, kwathi iWaterloo Blocks yaba sendaweni yesibili.
Emiklomelweni yeDurban Business Fair Excellence Awards, iPlastimed Packaging ithole umklomelo we-DBF Excellence Award. I-MM Clothing iwine umklomelo webhizinisi elizinze emaphandleni noma elokishini, kwathi i-Amazizi Leatherworks yawina oweBhizinisi Eliphethwe Ngowesifazane. Emklomelweni weBhizinisi Eliphethwe Yintsha, iMagaga Media and Communications neGrace Academy High School baphume phambili ngokulingana.
Imiklomelo yeDurban Fashion Fair Recognition Awards ihloniphe umsebenzi oncomekayo emkhakheni wezemfashini. I-Zwandy iwine oweqoqo elihamba phambili lezingubo zabesifazane, kwathi iHouse of Vyagor Louvre yawina oweqoqo lezingubo zabesilisa. UKireshen Chetty uqokwe njengomklami oneqoqo lezingubo elihamba phambili kuleli sonto.
USibu Msimang uqokwe njengoMklami Wonyaka waseThekwini, kwathi iMartin Bespoke yathola umklomelo wokuqamba okusha kwezemfashini. INellie D Designs iwine umklomelo womklami osafufusa waseThekwini, kanti iKARENMONKKLIJNSTRA neMita-N Dezynz bobabili bathole imiklomelo ekhethekile yokuhlonishwa ye-DFF.
Emiklomelweni yeRising Star, uHendeika Booi uphume phambili, walandelwa uSindiswa Khomo noLerato Mabesa. Emiklomelweni yeNew Face, uNoxolo Ndabambi uwine esigabeni samamodeli agqoka osayizi abakhulu, u-Awande Khuzwayo esigabeni sabesifazane sabosayizi abajwayelekile, kwathi uLindokuhle Mnqayi wawina esigabeni sabesilisa.
Ekhuluma nezihambeli ezingaba yinkulungwane, iMeya yeTheku, uKhansela Cyril Xaba, ithe le miklomelo ikhombisa ukuzibophezela kukaMasipala ekwandiseni ukubamba iqhaza kwezomnotho, ekwakheni amathuba okukhula kwamabhizinisi nasekuqiniseni umnotho wendawo obandakanya wonke umuntu.
“Namuhla kusihlwa sihlonipha abenze umsebenzi oncomekayo, siphinde siqinisekise ukuzibophezela kwethu ekuthuthukiseni amabhizinisi amancane kakhulu, amancane naphakathi nendawo, nasekwandiseni amathuba okubamba iqhaza emnothweni weTheku,” kusho uXaba.
Lolu hlelo oluhlanganisiwe luhlinzeka ngokwesekwa kwamabhizinisi okungaphezu kuka-R800 000, kanye namathuba okufinyelela ezimakethe. Imali yemiklomelo izosetshenziselwa ukuthuthukisa amabhizinisi, okuhlanganisa ukuthenga imishini ezowasiza aqinise ukusebenza kwawo futhi akhule.
Osomabhizinisi babonge uMasipala weTheku ngokutshala imali emabhizinisini endawo nangokuweseka ngezindlela ezizowasiza athuthukise ukusebenza kwawo, afinyelele ezimakethe futhi akhule ngendlela eqhubekayo.
Ikhishwe uPhiko Lwezokumaketha Nezokuxhumana lukaMasipala weTheku.
