ISITHOMBE: Umkhankaso wakamuva wokugomela amarabi ube yimpumelelo enkulu, wasiza ekuvikeleni izilwane ezifuywayo kanye nemiphakathi kulesi sifo esingagwemeka. Siyabonga kuzo zonke izakhamuzi ezibambe iqhaza. Eminye imikhankaso yokugoma izoqhubeka ezindaweni ezahlukene, ngakho qinisekisani ukuthi izilwane zenu ezifuywayo zigonyelwe amarabi. #WorldRabiesDay #RabiesFreeCommunity
SHEILA MHLONGO
UMnyango wezeMpilo kuMasipala weTheku uhlanganyele nabalingani bawo ekugubheni uSuku Lomhlaba Lokuqwashisa Ngamarabi (World Rabies Day) e-Umgababa Sports Field, ku-Ward 98, kugcizelelwa ukubaluleka kokusebenzisana ekulweni namarabi ngaphansi kwesiqubulo somhlaba esithi “Stronger Together” – “Sinamandla Uma Sibambisene.”
Lo mcimbi uhlanganise ochwepheshe bezempilo yezilwane kanye nezempilo yabantu ngaphansi kohlelo lwe-One Health, oluqhakambisa ukuthi impilo yabantu, yezilwane kanye nemvelo kuxhumene. Umkhankaso wenziwe ngokubambisana noMnyango wezeMpilo KwaZulu-Natal kanye noMnyango wezoLimo nokuThuthukiswa kweziNdawo zaseMakhaya KwaZulu-Natal.
Inhloso enkulu bekuwukufundisa umphakathi ngobungozi bamarabi, izindlela zokuwavimbela kanye nokubaluleka kokunakekela nokuvikela izilwane ezifuywayo. Izakhamuzi ziphinde zathola izinsiza zamahhala zokwelashwa kwezilwane ezifuywayo.
Zingu-309 izilwane ezigonyelwe amarabi, okuyizinja ezingu-308 kanye nekati elilodwa. Izinja ezingu-158 ziphinde zathola ukwelashwa kanye nemithi yokukhipha izikelemu. Le mizamo iyingxenye yezinhlelo eziqhubekayo zokunciphisa ukusabalala kwamarabi nokuvikela abantu nezilwane.
IMenenja ePhezulu yezokuVimbela nokuLawulwa kwezifo ezithathelanayo kuMasipala weTheku, uVusi Mbuthu, ithe imikhankaso yokuqwashisa nokugomela amarabi izoqhubeka ku-Ward 98 nase-Area 38, kanti izinhlelo ezifanayo zizoqhubeka nasezindaweni ezahlukene zeTheku ukuze imiphakathi ihlale inolwazi futhi ivikelekile.
Izikhulu zezempilo zikhumbuze umphakathi ukuthi amarabi angesinye sezifo ezibangelwa yigciwane eziyingozi kakhulu, kodwa angagwemeka ngokugoma ngesikhathi nangokuthola ukwelashwa ngokushesha uma umuntu echayeke egciwaneni.
Umuntu olunywe noma oklwebhwe yinja, ikati noma esinye isilwane okusolwa ukuthi singaba namarabi uyanxuswa ukuba ageze isilonda kahle ngamanzi agelezayo nensipho, bese eya ngokushesha emtholampilo noma esikhungweni sezempilo ukuze athole ukwelashwa okufanele kokuvimbela amarabi.
UMasipala uphinde wanxusa abanikazi bezilwane ukuba baqinisekise ukuthi izinja namakati abo zigonyelwa amarabi njalo, njengoba ukugoma kuyindlela ephumelela kakhulu yokuvimbela lesi sifo nokuvikela imiphakathi.
UMasipala weTheku uthe uzoqhubeka nokusebenzisana nabalingani bawo ekuqiniseni ezempilo yomphakathi, ukukhuthaza ukunakekelwa kwezilwane ngendlela efanele kanye nokulwa namarabi ngemikhankaso yemfundo, yokuqwashisa nokugoma.
Umthombo: UMasipala weTheku – Marketing and Communications Directorate
