SHEILA MHLONGO
UMasipala weTheku ugubhe nomphakathi waseThusong usuku lwabasebenzi bakahulumeni, ngosuku lwesibili lwemigubho yeThusong Week, abasebenzi bakaMasipala bebephume ngobuningi ngenhloso yokuyokwazisa umphakathi ngezinhlelo ezitholakala ezikhungweni zosizo lwamakhasimende.
Leli Sonto ligujwe ngabasebenzi bakahulumeni kuzwelonke lapho besuke bazisa khona umphakathi ngazo zonke izinsiza ezitholakala eminyangweni kahulumeni. Elinye lamathimba livakashele ikhaya labantu abadala iKuhle Konke Love and Care ukuyochitha isikhathi nabantu abadala. Elinye ithimba lona livakashele isikole iMnganiwakhe lafike lachazela abafundi ngezinsiza ezitholakala esikhungweni i-Archie Gumede, eClermont.
Bekukhona neloli loMnyango wezaseKhaya eThusong Centre yaseMnini ukuhlinzeka umphakathi ngezidingo. UMasipala weTheku unamaThusong Centre amabili.
